23.11.2024 | 12:34
ԱԺ պատգամավորներ կգործուղվեն Մոսկվա
Իրակլի Կոբախիձեն պաշտոնապես առաջադրվել է Վրաստանի վարչապետի պաշտոնում
Քաղաքականություն
01.02.2024 | 15:17
Վրաստանի իշխող «Վրացական երազանք» կուսակցությունը երկրի վարչապետի պաշտոնում պաշտոնապես առաջադրել է Իրակլի Կոբախիձեի թեկնածությունը, հայտնում է Վրաստանի «Առաջին ալիքը»։
Համագումարում ունեցած ելույթի ժամանակ «Վրացական երազանքի» նոր նախագահ Իրակլի Ղարիբաշվիլին հայտարարել է, որ վարչապետի պաշտոնում կուսակցության թեկնածուն լինելու է Իրակլի Կոբախիձեն և հաջողություն մաղթել նրան։ Համագումարի ընթացքում տեղի է ունեցել խորհրդանշական քվեարկություն։
Կոբախիձեն իր հերթին շնորհակալություն է հայտնել կուսակցության պատվավոր նախագահ Բիձինա Իվանիշվիլիին։
Իրակլի Կոբախիձեն հրապարակելու է նոր կառավարության կազմը, որից հետո հաջորդ շաբաթ խորհրդարանը հաստատելու է նոր վարչապետին և կառավարությանը։
Կառավարության բարձրագույն պաշտոնում առաջադրվելուց անմիջապես հետո Իրակլի Կոբախիձեն լրագրողներին ճեպազրույցի ժամանակ ասել է, որ բոլոր նախկին նախարարները կպահպանեն իրենց պաշտոնները իր կաբինետում, բացառությամբ պաշտպանության նախարար Ջուանշեր Բուրչուլաձեի, որը, ըստ ապագա վարչապետի, «ինքն է ցանկացել շարունակել գործունեությունը մեկ այլ ոլորտում՝ դիվանագիտությունում»։
Պաշտպանության նոր նախարարը կդառնա պրոֆեսիոնալ դիվանագետ Իրակլի Չիկովանին։
Էմմա Չոբանյան
