06.12.2025 | 23:56
Կապարակնքել են Գյումրիի Յոթ Վերք եկեղեցու դռները` Փաշինյանի այցից առաջ
Կանադան վերացնում է Թուրքիա ռազմական արտահանումների արգելքը, որը սահմանվել էր 44-օրյա պատերազմից հետո
Քաղաքականություն
30.01.2024 | 15:02
Կանադան հայտարարել է, որ այլևս չի արգելի որոշակի զենքի արտահանումը Թուրքիա։ Այս քայլը տեղի է ունենում Անկարայի կողմից ՆԱՏՕ-ին Շվեդիայի անդամակցության հայտի վավերացումից շուրջ մեկ շաբաթ անց, գրում է AFP-ն, որին վկայակոչում է Turkish Minute-ը։
Կանադայի կառավարության ծանուցման մեջ նշվում է, Թուրքիայի համար նախատեսված ռազմական ապրանքների և զենքի որոշ տեսակների տրամադրման թույլտվություններն «այժմ կվերանայվեն յուրաքանչյուր դեպքի հիման վրա»։
Կանադան պաշտոնապես արգելափակել էր Թուրքիա ռազմական արտահանումները 2021 թվականի ապրիլին՝ այն բանից հետո, երբ հետաքննությունը պարզել էր, որ Թուրքիա արտահանվող կանադական անօդաչու թռչող սարքերի տեխնոլոգիան օգտագործվել է Ադրբեջանի կողմից 2020 թվականի արցախյան 44-օրյա պատերազմի մասին։
Արտահանման արգելքը վերաբերում էր մոտ 30 թույլտվությունների և տարածվում էր ռազմական ապրանքների ու տեխնոլոգիաների լայն տեսականի վրա, ներառյալ՝ ինքնաթիռների արտադրության բաղադրիչները, թռիչքի սիմուլյատորների ծրագրային և տեխնիկական տվյալները, արբանյակային սարքավորումները և հրազենի բաղադրիչները:
Այժմ Կանադան թուրք ներկրողներից կպահանջի երաշխիքներ տրամադրել զենքի օգտագործման վերաբերյալ, ինչպես նաև, ըստ կառավարության հայտարարության, «հստակ նշում՝ արդյո՞ք ապրանքները վերարտահանվելու կամ փոխանցվելու են ՆԱՏՕ-ի անդամ չհանդիսացող երկրի»: Բացի այդ, Կանադան «ունի թույլտվությունները կասեցնելու կամ չեղարկելու լայն լիազորություններ»։
Նշվում է, որ ՆԱՏՕ-ին Շվեդիայի անդամակցության հայտի վավերացումից հետո ԱՄՆ կառավարությունն էլ հավանություն է տվել Թուրքիային F-16 ռազմական ինքնաթիռներ վաճառելու՝ 23 միլիարդ դոլար արժողությամբ գործարքին։
Կանադայի Հայ դատի հանձնախումբը հայտարարությամբ դատապարտել է երկրի կառավարության այս քայլը:
«Այս որոշումը տագնապալի մտահոգություններ է առաջացրել կանադահայ համայնքի շրջանում, քանի որ այն վտանգում է Կանադայի հավատարմությունը մարդու իրավունքներին, միջազգային անվտանգությանը և արդարադատությանը»,- ասվում է Հայ դատի հանձնախմբի հայտարարության մեջ:
Էմմա Չոբանյան
