24.02.2026 | 23:39
Հայաստանի մի շարք հասցեներում էլեկտրաէներգիայի անջատումներ կլինեն
Սկանդալներ՝ բուհերում, խառնաշփոթ՝ դպրոցներում․ ինչու էր աղմկում 2023-ը․ ՏԵՍԱՆՅՈՒԹ
Հասարակություն
30.12.2023 | 17:02
Մեծ աղմուկ՝ նոր դասագրքերի շուրջ, սկանդալներ՝ բուհերում, բռնության դեպքեր՝ ուսումնական հաստատություններում. 2023-ը կրթության ոլորտում աչքի ընկավ աղմկահարույց իրադարձություններով:
Եվ այսպես, տարվա ամենամեծ սկանդալներից մեկը նոր դասագրքերի շուրջ էր: Սեպտեմբերին դպրոցականներին տհաճ անակնկալ էր սպասվում. 2-րդ, 5-րդ և 7-րդ դասարանների դասագրքերը դպրոցներ հասան բավական ուշացած: Դպրոցականներն այդ ընթացքում ստիպված եղան օգտվել էլեկտրոնային գրքերից կամ դասագրքերի պատճեններից: Արդյունքում որոշ մարզերում դասագրքերը դպրոց հասան հոկտեմբերի կեսերին միայն:
Բայց ուր էր, թե դասագրքերի շուրջ աղմուկն այսքանով մարեր: Շուտով մասնագիտական շրջանակների քննադատության թիրախում հայտնվեց 7-րդ դասարանի Հայոց պատմության դասագիրքը: Դժգոհությունները շատ էին, խոսվեց, օրինակ, այն մասին, որ դասագրքի քարտեզում Արցախն առանձնացված չէ, այն Ադրբեջանի սահմաններում է գծանշված, հետո այն, որ Արծվաշենը դուրս է մնացել դասագրքից: Եվ չնայած այս մեծ աղմուկին՝ դասագիրքը մնաց կիրառության մեջ:
Արդեն դեկտեմբերին ԿԳՄՍ նախարարն ընդունեց դասագրքի փոփոխության նախաձեռնությամբ հանդես եկած պատմաբանների խմբին և պատրաստակամություն հայտնեց անհրաժեշտ փոփոխությունների հետ կապված: Ժաննա Անդրեասյանը նաև հայտարարեց՝ փոփոխություն է իրականացվելու դասագրքերի փորձաքննության կարգում՝ կարևորելու մասնագիտական կառույցների դերակատարումը։
Բայց մտահոգիչ է, որ դասագրքերը հայտնվեցին ոչ միայն հայ քննադատների, այլև թուրք հաքերների թիրախում. նրանք կոտրել էին 5-րդ դասարանի Մայրենիի դասագրքի QR կոդերի հղումները:
2023-ին սկանդալների կենտրոնում հայտնվեցին նաև մի շարք բուհեր: Դեռ նախորդ տարվանից կրքերը թեժ էի Բրյուսովի անվան պետական համալսարանի շուրջ: Բողոքի մեծ ալիք բարձրացավ, երբ Դավիթ Գյուրջինյանը նշանակվեց բուհի ռեկտորի պաշտոնակատար: Մեղադրանքներ հնչեցին առ այն, որ Գյուրջինյանին ուղարկում են Բրյուսովի համալսարան, այսպես ասած, որպես «փրկիչ», որը պետք է բուհը հաներ ճգնաժամից, մինչդեռ քննադատություններ էին հնչում, որ նրա նշանակումն ապօրինի է:
Բողոքի մեծ ալիք բարձրացավ նաև Հայ-ռուսական համալսարանում ռեկտորի ընտրությունների ժամանակ. պահանջը մեկն էր՝ ապահովել ռեկտորի ընտրության բնականոն ընթացքն ու համալսարանի ինքնավարությունը: Տարածվեցին խոսակցություններ այն մասին, որ այն ժամանակվա ռեկտոր Արմեն Դարբինյանին ուզում են փոխարինել Ռուսաստանից ուղարկված ռեկտորով: Ու չնայած ստորագրահավաքին ու դժգոհություններին՝ Հայ-ռուսական համալսարանի ռեկտոր նշանակվեց Էդվարդ Սանդոյանը: Եվ բավական խոսուն էր այն փաստը, որ որոշումն ընդունվեց Ռուսաստանի Կազան քաղաքում:
Մանրամասները՝ տեսանյութում։
Աննա Բաբաջանյան
