Արցախցիները հավաքվել են այրվածքաբանական հիվանդանոցի մոտ, փնտրում են հարազատներին. ՏԵՍԱՆՅՈՒԹ

Այրվածքաբանական հիվանդանոցի բակում բազմաթիվ արցախցիներ են հավաքվել, եկել են հույսով, որ իրենց հարազատներից գոնե մի տեղեկություն ստանան։

«Այսօր եմ խոսել ամուսնուս հետ, ինքը իր մոտ հեռախոս չունի, իր մոտ մարդ կար, տվեց հեռախոսը, խոսեցի, բայց հիմա տեղեկություն չունեմ։ Գիտակից էր, բայց շատ այրվածքներ ուներ»,- Factor.am-ի հետ զրույցում ասաց արցախցի մի կին, որը այրվածքներ ստացած ամուսնու լուսանկարը ցույց էր տալիս հիվանդանոցի բակ մտնողներին։

Թե քանի տուժած կա այրվածքաբանականում՝ չի հաղորդվում։ Միայն բժիշկներից մեկը դրսում սպասող արցախցիներին փոխանցեց, որ հիվանդանոցում այլևս ազատ տեղեր չկան։ Մյուսներին տեղափոխում են Էրեբունի, «Երևան», Միքայելյան և «Գրիգոր Լուսավորիչ» բժշկական կենտրոններ։ Factor.am-ի այնտեղ գտնվելու ընթացքում, սակայն, բերեցին ևս մեկ քաղաքացու, որի վնասվածքները դեմքի շրջանում էին։

Այրվածքաբանական հիվանդանոցում հոսպիտալացված տուժածների մասին հարազատներին դեռ անհատական տեղեկություններ չեն հաղորդում։ Բժիշկներից մեկը հայտարարեց, որ գոնե մեկ նախադասությամբ տեղեկություն կտան ավելի ուշ։ Հիվանդանոցից միայն դուրս են գալիս այրվածքներ ստացած քաղաքացիների թարմացված ցուցակները կարդում և հեռանում։ Տարածքում կային բազմաթիվ մարդիկ, որ այդպես էլ չէին լսում իրենց հարազատների անունները։ Նրանք չէին ցանկանում ներկայացնել իրենց անհատական դեպքերը։

Հիշեցնենք՝ երեկ երեկոյան Արցախում վառելիքի պահեստում պայթյուն էր գրանցվել։ Պատճառները դեռ պարզ չեն, միայն հայտնի է, որ այդ բենզինն Ադրբեջանն էր ուղարկել՝ որպես հումանիտար օգնություն։ Պայթյունի հետևանքով ժամը 22:00-ի դրությամբ տուժածների թիվը 290 է, հաստատված մահերի թիվը 68 է (21-ի ինքնությունը պարզ է, մյուսներինը՝ ոչ), ճակատագիրն անհայտ քաղաքացիների թիվը 105 է։

Մանրամասները՝ տեսանյութում։