Հասարակություն
19.06.2023 | 12:51Բարձրագույն դատական խորհրդում շարունակվում է դատավոր Դավիթ Հարությունյանի վերաբերյալ կարգապահական գործի դռնփակ քննությունը: Շուրջ մեկ ժամ առաջ Դավիթ Հարությունյանը դուրս եկավ նիստերի դահլիճից ու կարճ ճեպազրույց ունեցավ լրագրողների հետ` հայտնելով, որ իր համար անհասկանալի է թե ներսում ինչ է կատարվում:
«Չեմ հասկանում` էստեղ ինչ է կատարվում, ինչ կանոններ են, միայն միանվագ Արդարադատության նախարարության միջնորդություններն են քննվում»,- ասաց Դավիթ Հարությունյանը: Նա հայտնեց, որ իր հետ տեխնիկա է տարել, որպեսզի հնարավորություն ունենա տեսագրություն իրականացնել, ինչը ցանկացել են չթույլատրել: «Ուզում եմ կրիչը լսեմ, հասկանամ` ճիշտ լսեցի, որ ասացին` ֆիզիկական ուժ կիրառեք, ասացի` ի՞մ նկատմամբ, ասաց` չէ, գույքի»,- նշեց Դավիթ Հարությունյանը:
Դատավորը հայտարարեց, որ իր գույքն այնուհետև դուրս է հանվել նիստերի դահլիճից: Դատավորն ասաց, որ ցանկանում է լսել նիստի կրիչը` հասկանալու համար` հանցագործության, թե՞ կարգապահական պատասխանատվության ենթարկելու մասին հաղորդում ներկայացնել:
Նիստն այնուհետև շարունակվեց: Քիչ անց կրկին ընդմիջում հայտարարվեց, որից դուրս գալուց հետո Դավիթ Հարությունյանը հայտնեց, որ իրեն բանավոր զգուշացրել են նիստի վերաբերյալ տվյալներ չհրապարակելու մասին: Նշենք, որ դատավորն ի սկաբանե առանց փաստաբանի էր ներկայացել ԲԴԽ, սակայն այժմ 17 փաստաբան, ԲԴԽ շենքի դիմաց է և պատրաստակամություն է հայտնել ստանձնելու դատավորի պաշտպանությունը: Մեկ փաստաբան` Միքայել Շխիմյանը, տեղի ունեղածից հետո ներգրավվել է դատավորի պաշտպանությանն ու նիստերի դահլիճում է:
Արաքս Մամուլյան
