03.10.2026 | 17:56
Վարորդը ծխեց դպրոցական ավտոբուսում՝ կազատվի, սա կարմիր գիծ ա. Փաշինյան. ՏԵՍԱՆՅՈւԹ
ԱՄԷ-ի գլխավոր դատախազ․ Flydubai-ի երկրորդ օդաչուն ահաբեկչություն էր ծրագրում
Քաղաքականություն
03.10.2026 | 17:29
Միացյալ Արաբական Էմիրությունների դատախազությունը Դուբայից Թել Ավիվ թռչող Flydubai ավիաընկերության ինքնաթիռի արտակարգ վայրէջքի դեպքի քննության ընթացքում պարզել է, որ երկրորդ օդաչուն արտակարգ իրավիճակների համար նախատեսված կացնով հարձակվել է օդանավի հրամանատարի վրա։ Ինչպես շաբաթ օրը՝ հոկտեմբերի 3-ին, հայտնել է ԱՄԷ-ի գլխավոր դատախազ Համադ Սաիֆ Ալ-Շամսին, հարձակվողը փորձել է ահաբեկչություն իրականացնել։
Գլխավոր դատախազի խոսքով՝ երկրորդ օդաչուն օդաչուների խցիկում հարձակվել է հրամանատարի վրա և փորձել ստանձնել ինքնաթիռի կառավարումը։ Քննությունը շարունակվում է։ Դրա շրջանակում պետք է պարզվեն միջադեպի հանգամանքները, հարձակվողի շարժառիթներն ու հնարավոր կապերը։
Ամերիկյան ABC News հեռուստաալիքի տեղեկություններով՝ երկրորդ օդաչուն, որը սեպտեմբերի 30-ին Դուբայից Թել Ավիվ ուղևորվող FZ1073 չվերթում էր, նախկինում անվտանգության նկատառումներով հեռացվել էր Օմանի Oman Air ավիաընկերությունից։
ABC News-ը, վկայակոչելով հետախուզության և իրավապահ մարմինների բարձրաստիճան ներկայացուցիչներին, հայտնում է, որ 2024 թվականին Oman Air-ում երկրորդ օդաչուի կարգավիճակով պրակտիկայի ընթացքում նրա մոտ հայտնաբերվել էին ծայրահեղական բնույթի նյութեր։
Հեռուստաալիքը նաև նշել է կասկածյալի անունը։ Քննությանը ծանոթ աղբյուրների տվյալներով՝ նա 29-ամյա Օմանի քաղաքացի Համամ Ալ-Համամին է։ Թռիչքներից հեռացվելուց հետո նրան թույլատրվել էր շարունակել աշխատել Oman Air-ում՝ վարչական պաշտոնում։
Flydubai ավիաընկերության՝ սեպտեմբերի 30-ին Դուբայից Թել Ավիվ ուղևորվող մարդատար ինքնաթիռը առևանգման փորձի մասին ահազանգից հետո արտակարգ վայրէջք է կատարել Սաուդյան Արաբիայի Թաբուք քաղաքի օդանավակայանում։
Պատճառը օդաչուների խցիկում տեղի ունեցած ծեծկռտուքն էր, որի ընթացքում ինքնաթիռը ընդամենը 29 վայրկյանում կտրուկ կորցրել է բարձրությունը՝ 9410 մետրից իջնելով 5105 մետր։
Boeing 737 MAX 8 ինքնաթիռում եղել է 174 մարդ, այդ թվում՝ 27 երեխա։ Նրանց մեծ մասը Իսրայելի քաղաքացիներ էին։
Որոշ ուղևորների խոսքով՝ սկզբում օդաչուների խցիկից ճիչեր են լսվել, այնուհետև խցիկի դուռը բացվել է, և նրանք տեսել են, որ օդաչուներից մեկը վիրավոր է, իսկ նրա հագուստը՝ արյունոտ։ Նրան առաջին բուժօգնություն են ցուցաբերել։ Ուղևորներից մեկը բժիշկ է եղել։ Անձնակազմի անդամներին և ուղևորներին հաջողվել է նաև վնասազերծել հարձակվողին։
Չվերթի օդաչուն Հնդկաստանի քաղաքացի Սմիթ Մաչչհարն էր, որը վնասվածքներով հոսպիտալացվել է Սաուդյան Արաբիայում։
Հնդկաստանի վարչապետ Նարենդրա Մոդիի հետ տեսազանգի ժամանակ նա պատմել է, որ իր վրա հարձակումից հետո հասկացել է՝ ինքնաթիռն արագ կորցնում է բարձրությունը, և ժամանակ գրեթե չի մնացել։
«Ես վիրավոր պառկած էի հատակին, բայց ինքս ինձ ասացի, որ պետք է վերջին ջանք գործադրեմ և ներսից բացեմ դուռը։ Սկսեցի սողալ։ Դուռը շատ մոտ էր։ Կարողացա բացել այն, և մյուս մարդիկ ներս մտան»,- նրա խոսքերը մեջբերում է The Telegraph-ը։
Մոդին օդաչուի գործողությունները որակել է որպես խիզախության, տոկունության և արագ որոշումներ կայացնելու ունակության դրսևորում, որոնք, նրա խոսքով, փրկել են բազմաթիվ մարդկանց կյանքեր։
