Վարորդը ծխեց դպրոցական ավտոբուսում՝ կազատվի, սա կարմիր գիծ ա. Փաշինյան. ՏԵՍԱՆՅՈւԹ

ՀՀ վարչապետ Նիկոլ Փաշինյանն անդրադարձել է մարզերում դպրոցականների տեղափոխման անվտանգությանն ու հարմարավետությանը, վարորդների որակավորմանն ու վարքագծին՝ ընդգծելով, որ դպրոցական ավտոբուսում ծխելն ու անպատշաճ արտաքին տեսքը խիստ պատժվելու են:

Վարչապետի խոսքով՝ անհրաժեշտ է ձերբազատվել 1970-80-ական թվականների հին «ՊԱԶ» ավտոբուսներից, որոնցով նախկինում տեղափոխում էին երեխաներին։ Նոր ավտոբուսները հարմարավետ են, չափերով ավելի ընդարձակ և հագեցած են օդորակիչներով․ «Շատ կարևոր է, որ երեխեքը սենց ավտոբուս տեսած լինեն… որովհետև երբ որ մենք ասել ենք ավտոբուս, իրենք պատկերացրել են էդ դժոխքը, որով իրենք պետք է ճանապարհ գնան»:

Բացի այդ, ավտոբուսներում լինելու են նաև հատուկ ուղեկցողներ, ովքեր կօգնեն երեխաներին և կապահովեն տեղափոխման պատշաճ մշակույթը։

Նիկոլ Փաշինյանն առանձնահատուկ ընդգծել է վարորդների արտաքին տեսքի, հագուստի, սափրված լինելու և վարքագծի կանոնների պահպանման անհրաժեշտությունը․ «Մի դեպք արձանագրվեց վարորդի՝ ավտոբուսի մեջ ծխելու, դա պետք է բերի կոնկրետ կադրային հետևանքների։ Այսինքն՝ մարդիկ պետք է ազատվեն, ում պարտականությունն է դա վերահսկելը։ Այսինքն՝ սա կարմիր գիծ է։ Մի հատ չսափրված վարորդ եղավ՝ պրոբլեմ է»։

Վարորդների ընտրությունն իրականացվում է տարիքային, առողջական և մասնագիտական որակավորման հատուկ պահանջներին համապատասխան։

Վարչապետը զրուցել է նաև Արագածոտնի և Տավուշի (Իջևան) մարզերում դպրոցականներին սպասարկող վարորդների հետ։ Վարորդները նշել են, որ ունեն երկարամյա աշխատանքային փորձ (մինչև 19 տարվա ստաժ) և գոհ են նոր ավտոբուսների պայմաններից։ Փաշինյանը հորդորել է նրանց պատասխանատվությամբ ծառայել և ապահովել երեխաների անվտանգությունը։

Մանրամասները՝ տեսանյութում։