06.11.2026 | 19:13
Տեղի է ունեցել Հայաստանի և Վրաստանի պետական սահմանի սահմանազատման և սահմանագծման հանձնաժողովների միջև հանդիպումը
ՄԻՊ-ը և ՅՈՒՆԻՍԵՖ-ը քննարկել են երեխաների իրավունքների պաշտպանության առաջնահերթությունները
Հասարակություն
03.10.2026 | 15:07
Մարդու իրավունքների պաշտպանի աշխատակազմից հայտնում են, որ Անահիտ Մանասյանը հոկտեմբերի 2-ին ընդունել է ՅՈՒՆԻՍԵՖ-ի նորանշանակ ներկայացուցիչ Ղասան Խալիլի գլխավորած պատվիրակությանը։ Հանդիպմանը կողմերը քննարկել են երեխաների իրավունքների պաշտպանությանն առնչվող հարցեր և ՄԻՊ հաստատության ու ՅՈՒՆԻՍԵՖ-ի հետագա համագործակցության ուղղությունները։
Մարդու իրավունքների պաշտպանի աշխատակազմի տարածած հաղորդագրությունը՝ ստորև․
«Մարդու իրավունքների պաշտպան Անահիտ Մանասյանը հոկտեմբերի 2-ին ընդունել է ՄԱԿ-ի Մանկական հիմնադրամի (ՅՈՒՆԻՍԵՖ) նորանշանակ ներկայացուցիչ Ղասան Խալիլի գլխավորած պատվիրակությանը։
Ողջունելով հյուրին՝ Անահիտ Մանասյանը շնորհավորել է նրան կարևոր հանձնառությունն ստանձնելու առթիվ և մաղթել արդյունավետ աշխատանք։
Անահիտ Մանասյանը կարևորել է ՄԻՊ հաստատության և ՄԱԿ-ի Մանկական հիմնադրամի համագործակցությունը՝ երեխաների իրավունքներին առնչվող առանցքային հարցերի հասցեավորման տեսանկյունից։
Պաշտպանն ընդգծել է, որ երեխաների իրավունքների պաշտպանությունը ՄԻՊ հաստատության համար հանդիսանում է կարևոր առաջնահերթություն՝ նշելով, որ երեխաների իրավունքները երբևէ չեն կարող դիտարկվել որպես երկրորդական` իրավունքների այլ ոլորտների համեմատությամբ։
Մարդու իրավունքների պաշտպանը կարևորել է նաև հանրային ընկալումների փոփոխության անհրաժեշտությունը՝ այս գործընթացում ընդգծելով նաև ՄԱԿ-ի Մանկական հիմնադրամի առանցքային դերակատարությունը։
Իր խոսքում Մարդու իրավունքների պաշտպանն անդրադարձել է ՄԱԿ-ի Մանկական հիմնադրամի հետ համագործակցության կարևոր արդյունքներից մեկին՝ Մարդու իրավունքների պաշտպանին առընթեր երեխաների իրավունքների պաշտպանության հարցերով հասարակական խորհրդի գործունեությանը՝ այն գնահատելով որպես երեխաների ձայնը լսելի դարձնելու, նրանց մասնակցության ապահովման և ոլորտային խնդիրների արդյունավետ հասցեավորման լավագույն փորձերից մեկը։
Իր հերթին Ղասան Խալիլին շնորհակալություն է հայտնել ընդունելության համար և կարևորել Պաշտպանի հաստատության դերը երեխաների իրավունքների պաշտպանության առաքելության իրականացման գործում։
Կողմերը մտքեր են փոխանակել նաև Պաշտպանի աշխատակազմի հետ ընթացիկ և հետագա համագործակցության ուղղությունների, երեխաների իրավունքների պաշտպանությանն առնչվող մի շարք այլ հարցերի վերաբերյալ»։
