Ծխախոտով այրել են ոստիկանություն տարված անձի դեմքը. պաշտպան․ ՏԵՍԱՆՅՈՒԹ

Ոստիկանը ծխախոտը հանգցրել է ոստիկանություն տարված անձի քթին: Այս մասին այսօր լրագրողների հետ հանդիպմանը հաստատեց փաստաբան Կարեն Ալավերդյանի պաշտպանյալի նկատմամբ բռնության գործով պաշտպան Մարիամ Աբրահամյանը:

Հիշեցնենք, որ հունիսի 7-ին Ոստիկանության կենտրոնական բաժնում փաստաբան Կարեն Ալավերդյանի նկատմամբ ոստիկանների կողմից ոչ միայն բռնություն է կիրառվել, այլ նաև ձերբակալվել է: Բռնությունը գործադրվել է այն բանից հետո, երբ փաստաբանը ոստիկանների կողմից բռնության ենթարկված իր պաշտպանյալին փորձել է մասնագիտական աջակցություն ցուցաբերել:

«Պաշտպանյալս որևէ հակաիրավական վարքագիծ չի դրսևորել: Մեզ համար անհասկանալի է, թե ինչու է նա ենթարկվել դաժան ծեծի և խոշտանգման:
Նրա քթի վրա ծխախոտ են հանգցրել, քթի որոշ հատվածներ այրված են: Ունի բավականին վնասվածքներ, բժշկական հետազոտության է ենթարկվել և պարզվել է, որ ականջի թմբկաթաղանթի ամբողջականությունն է խախտված»,- նշեց Աբրահամյանը:

Նրա խոսքով՝ դատաբժշկական փորձաքննության որոշումը բավականին ուշ է կայացվել և այն էլ պաշտպանների մեծ ջանքերից հետո. «Նա սուր ցավեր է ունեցել ձերբակալված ների պահման վայրում, այնտեղից նրան շտապօգնության մեքենան տարել է հիվանդանոց»:

Մարիամ Աբրահամյանը հայտնեց, որ իր պաշտպանյալի նկատմամբ որպես խափանման միջոց է ընտրվել տնային կալանքը. «Մենք երեկ այցելեցինք նրան, պարզվեց, որ նա կողերի հատվածում ևս լուրջ ցավեր ունի: Նրան առաջիկայում սպասվում է ականջի վիրահատություն»:

Փաստաբանը նաև հայտնեց, որ կալանքի միջնորդության քննության ժամանակ նույնպես իրենց մասնագիտական գործունեությունը խոչընդոտվել է։

Մանրամասները՝ տեսանյութում։