Թե՛ դպրոցում, թե՛ սոցցանցերում կարծիքը ներկայացվում է որպես վերջնական ճշմարտություն. ապաքաղաքական զրույց Գայանե Աբրահամյանի հետ ՏԵՍԱՆՅՈՒԹ

Factor TV-ի A-politic հաղորդաշարի հյուրն է «Հանուն հավասար իրավունքների» կրթական կենտրոնի նախագահ Գայանե Աբրահամյանը: Նրա կարծիքով՝ տեղեկատվական աղբյուրների այսօրվա բազմազանությունը, բոլոր առավելություններով հանդերձ, իր մեջ նաև վտանգներ է պարունակում, քանի որ այսօրվա երիտասարդների, հատկապես՝ դեռահասների մոտ հաճախ չեն ձևավորվում որոշակի էթիկական և գեղագիտական չափանիշներ:

Այն, որ համացանցում որոշակի բովանդակություն մշտական կրկնություններով մատուցվում է սպառողին, հաղորդման հյուրի կարծիքով, բացատրվում է նախևառաջ շուկայական շահագրգռվածությամբ: Բացառված չեն, սակայն, նաև գաղափարախոսական դրդապատճառները:

Ինչպե՞ս կարող է սպառողը տեղեկատվական տարափի մեջ ընտրել այն աղբյուրները, որոնք քիչ թե շատ արժանահավատ են: Ըստ Գայանե Աբրահամյանի՝ եթե խոսքն ավանդական լրատվամիջոցներով (նաև լրատվական կայքերով) սփռվող տեղեկությունների մասին է, ապա այստեղ որոշակի դեր ունեն նաև լրագրողները, որոնք պետք է ճշտեն՝ այն մարդիկ, որոնք ներկայանում են որևէ ոլորտի «փորձագետ», իրավասո՞ւ են, արդյոք, տեսակետ հայտնել այդ ոլորտի խնդիրենրի մասին: Դրանով է նաև որոշվում տվյալ լրատվամիջոցի որակյալ կամ ոչ որակյալ լինելը: Բայց բոլոր դեպքերում, եթե նույնիսկ փորձագետն «իրական» է,  սպառողը  պետք է հասկանա, որ դա ընդամենը տեսակետ է: Նույն մոտեցումը ցանկալի է դրսևորել նաև դպրոցում՝ դասը պատմելու և հետո հարցնելու պրակտիկան անհրաժեշտ է փոխարինել քննարկմամբ: Հակառակ դեպքում կարծիքը դարձյալ ներկայացվում է որպես վերջնական ճշմարտություն:

Մանրամասները տեսանյութում:

Արամ Արբահամյան