Սոցիալական ցանցը համահարթեցման դաշտ է, որտեղ ամեն ինչ խառնված է. ապաքաղաքական զրույց Վահե Արսենի հետ. ՏԵՍԱՆՅՈՒԹ

Factor TV-ի A-politic հաղորդաշարի հյուրն է բանաստեղծ, թարգմանիչ, բանասիրական գիտությունների թեկնածու Վահե Արսենը: Նրա կարծիքով՝ կարևոր խնդիր է՝ արդյո՞ք պոեզիան գրվում է որպես հոգու արձագանք տիեզերքին կամ մեր իրականությանը, թե՞ մարդը պարզապես համակարգչին է հանձնում իր էմոցիաներն ու ցանկանում է, որ ընթերցողները ծանոթ լինել իր ներքին տագնապներին կամ դեպրեսիային:

Հաղորդման հյուրը համոզված է, որ պոեզիան զգայական դաշտում է: Այստեղ մարդը չի կարող պարզապես տեքստը կարդալ ու ընկալել: Պոեզիան, այդպիսով, հասկանալու համար չէ, զգալու համար է: Եվ երբ ընթերցողները բանաստեղծին ասում են, որ ինչ-որ բան զգացել են, բայց չեն հասկացել, դա, Վահե Արսենի կարծիքով, լավագույն գնահատականն է:

Այն պայմաններում, երբ գրքերի և գրական ամսագրերի ընթերցողների թիվը պակասում է, արդյո՞ք նպատակահարմար չէ բանաստեղծությունները հրապարակել սոցիալական հարթակներում: Պատասխանելով այս հարցին՝ բանաստեղծը նշում է, որ նա երբեմն այսպես էլ վարվում է: Բայց պետք է հաշվի առնել, որ այդ հարթակները համահարթեցման դաշտ են, որտեղ միևնույն «հնչեղությունը» կարող են ունենալ արժեքավորն ու անարժեքը, կարևորն ու անկարևորը: Եվ ամենացավալին այն է, որ ցանկացած օգտատեր, անկախ իր կրթական ու մտավոր ցենզից, հնարավորություն ունի սոցցանցերում ցանկացած խնդրի շուրջ հայտնել իր կարծիքը:

Վահե Արսենի կարծիքով՝ դա ոչ թե ժողովրդավարության, այլ ողբերգության նշան է:

Մանրամասները՝ տեսանյութում:

Արամ Աբրահամյան