Քաղաքականություն
22.06.2018 | 20:28ՀՔԱ Վանաձորի գրասենյակի նախագահ Արթուր Սաքունցի համոզմամբ՝ նախքան Ազգային անվտանգության ծառայության կողմից կոռուպցիոն սխեմաների բացահայտմանն անդրադառնալը նախևառաջ պետք է ուշադրություն դարձնել այն հանգամանքին, որ ՀՀ-ում 30 տարի անպատժելի համարվող անձինք այլևս դառնում են օրենքի առաջ հավասար. «Անպատժելիության համակարգն, ըստ էության, քայլ առ քայլ վերանում է և անպատժելիների մի ամբողջ դաս դառնում է սովորական հողեղեն քաղաքացի և օրենքի առաջ ենթարկվում է պատասխանատվության, իսկ դա ամենավարդագույն երազում անգամ հնարավոր չէր պատկերացնել»,-Factor.am-ի հետ զրույցում ասաց իրավապաշտպանը:
««Նաիրիտի» հետ կապված ֆինանսական ներդրումների յուրացումներ, օվշորային սկանդալներ ՝ պանամյան և կիպրոսյան. մենք անընդհատ պետք է բարձրաձայնենք, որ նաև այս փաստական հիմքերով ներկայացված կոռուպցիոն հանցագործությունների ուղղությամբ կատարվեն գործողություններ»,-ասաց նա:
Անդրադառնալով բացահայտումների ֆոնին մարդու իրավունքների պաշտպանությանը՝ Արթուր Սաքունցը խոսեց նաև ձերբակալված պատգամավոր Մանվել Գրիգորյանի՝ պատժի կրման հետ անհամատեղելի հիվանդությունների մասին և ընդգծեց.«Դրա համար կարող են հիմնավորում ներկայացնել դատարան, ցույց տալ՝ թե ինչ հիվանդություններ ունի Մ. Գրիգորյանը, որոնք անհամատեղելի են, բայց պետք է նաև հիմնավորեն, որ ազատության մեջ մնալով Գրիգորյանը չի ազդի նախաքննության մարմնի վրա»:
ՀՔԱ Վանաձորի գրասենյակի նախագահը Մանվել Գրիգորյանի շուրջ կատարվողի մասին խոսելիս առանձնացրեց հատկապես Սերժ Սարգսյանի գործոնը և նշեց, որ առանց ՀՀ 3-րդ պաշտոնաթող նախագահի իմացության նման բան չէր կարող լինել. «Ես գտնում եմ, որ Սերժ Սարգսյանի գլխավորությամբ պետք է բոլորը ներգրավվեն որպես մեղադրյալներ»,-ասաց նա՝ ընդգծելով սակայն, որ չի կարծում՝ գլխավոր դատախազը համարձակություն ունի Սերժ Սարգսյանի նկատմամբ քրեական գործ հարուցելու:
Մանրամասները՝ տեսանյութում:
