Թուրքիայում ոստիկանությունը ձերբակալել է ֆուտբոլային թիմի վեց երկրպագուի` Քուրդիստանի դրոշը ծածանելու համար

Քրդական «Ամեդսպոր» ֆուտբոլային թիմի վեց երկրպագուներ ձերբակալվել են այն բանից հետո, երբ Թուրքիայի Ներքին գործերի նախարարությունը հետաքննություն է սկսել հարավարևելյան Դիարբեքիր նահանգում կայացած հանդիպման ժամանակ Քուրդիստանի դրոշը ծածանած աջակիցների նկատմամբ, գրում են թուրքական լրատվամիջոցները։

Դիարբեքիրի մարզադաշտում կայացած խաղի արդյունքում «Անեդսպոր»-ը 0-2 հաշվով հաղթել է «Բուրսասպոր»-ին։ Երկու թիմերն էլ հանդես են գալիս Թուրքիայի ֆուտբոլի ֆեդերացիայի երկրորդ լիգայում։

Նշվում է, որ ոստիկանությունը միջամտել է, երբ «Անեդսպոր»-ի մի քանի երկրպագուներ ծածանել են Հյուսիսային Իրաքում Քուրդիստանի տարածաշրջանային կառավարության դրոշը և քրդամետ կարգախոսներ վանկարկել՝ տոնելու իրենց թիմի հաղթանակը:

ՆԳՆ-ն հայտարարել է, որ երկրպագուների նկատմամբ հետաքննություն է սկսվել Դիարբեքիրում կայացած խաղի ժամանակ Քուրդիստանի դրոշների ցուցադրման և քրդամետ կարգախոսներ վանկարկելու պատճառով։ Նախարարությունը կատարվածը որակել է, որպես «սադրանք» և նշել, որ երկրպագուները դրոշները մարզադաշտ են բերել իրենց հագուստի տակ։ Նշվում է, որ մարզադաշտերում որևէ սադրանք չի թույլատրվելու։

Այս հայտարարությունից հետո Ոստիկանությունը սկսել է խուզարկություններ որոշ երկրպագուների տներում, որի ընթացքում վեց մարդ ձերբակալվել է։ Նրանք մեղադրվում են «երևակայական երկրի դրոշը ծածանելով ահաբեկչական գործողության մեջ» և տարվել Դիարբեքիրի ոստիկանական բաժանմունք՝ հարցաքննության։

Դիարբեքիրի փաստաբանների ասոցիացիան գրավոր հայտարարությամբ դատապարտել է «Անեդսպոր»-ի երկրպագուների ձերբակալությունը՝ հիշեցնելով, որ նրանց ծածանած դրոշը պատկանում է Իրաքի Սահմանադրությամբ ճանաչված Քուրդիստանի Հանրապետության վարչակազմին։ Ասոցիացիան նշում է, որ երկրպագուների նկատմամբ հետաքննություններն և ձերբակալումներն անընդունելի են և չունեն իրավական հիմքեր, և որ ձերբակալվածները պետք է անհապաղ ազատ արձակվեն:

Էմմա Չոբանյան