Երեխայի համակարգիչն են առգրավել. փաստաբանը մանրամասներ ներկայացրեց Կարապետյանի տան խուզարկությունից․ ՏԵՍԱՆՅՈՒԹ

Սամվել և Նարեկ Կարապետյանների բնակարաններում իրականացվող խուզարկության ընթացքում իրավապահներն առգրավել են երեխայի համակարգիչը, փաստաթղթեր, էլեկտրոնային կրիչներ և այլ իրեր։ Այս մասին լրագրողների հետ զրույցում ասաց Կարապետյանների փաստաբան Արմեն Ֆերոյանը։

Նրա խոսքով՝ քննիչները որևէ արտասովոր բան չեն հայտնաբերել, իսկ կատարվող գործողությունները որակեց որպես «քաղաքական հետապնդման հերթական դրսևորում»։

«Խուզարկություն արեցին, երեխայի համակարգիչը առգրավեցին։ Ոչ մի արտասովոր բան․ հերթական ապօրինությունների շարքից է, հերթական քաղաքական հետապնդման դրսևորման ձևերից է»,- ասաց նա։

Պատասխանելով լրագրողների այն հարցին, թե հատկապես ինչ է առգրավվել՝ փաստաբանը պարզաբանեց, որ համակարգչից բացառապես երեխաներն էին օգտվում, և դրա մեջ առկա էին միայն մանկական խաղեր։

Փաստաբանը նշեց, որ դեռևս չի տիրապետում մանրամասներին, թե կոնկրետ որ վարույթի շրջանակում են իրականացվում գործողությունները, ինչպես նաև տեղեկություն չունի մամուլում շրջանառվող 65 հասցեներում խուզարկությունների և հնարավոր ձերբակալությունների մասին։

Հիշեցնենք՝ այսօր առավոտյան կուսակցության խոսնակ Աղավնի Սուքիասյանը գրել էր, որ վաղ առավոտից Քննչական կոմիտեի քննիչները խուզարկություններ են իրականացնում «Ուժեղ Հայաստան» կուսակցության առաջնորդ Սամվել Կարապետյանի և ԱԺ «Ուժեղ Հայաստան» խմբակցության ղեկավար Նարեկ Կարապետյանի բնակարաններում։

«Խուզարկություններ են տեղի ունենում նաև Կարապետյան ընտանիքի հետ կապվող այլ հասցեներում»,- գրել էր Սուքիասյանը։

Ավելի ուշ ՔԿ-ն հաղորդագրություն տարածեց, ըստ որի ՀՀ քննչական կոմիտեի տնտեսական հանցագործությունների և մաքսանենգությունների քննության գլխավոր վարչությունում քննվող քրեական վարույթի շրջանակում այս պահին 65 հասցեներում իրականացվում են միաժամանակյա խուզարկություններ։

Մանրամասները՝ տեսանյութում։

Ռոզա Վարդանյան