04.11.2026 | 15:20
ՀԷՑ-ին պատճառվել է 64.5 մլրդ դրամի վնաս. հանրային քրեական հետապնդում է հարուցվել 36 անձի նկատմամբ
Երեմյան կաթնամթերքում խախտումներ չեն հայտնաբերվել․ ընկերությունը ներկայացրել է փորձաքննությունների արդյունքները․ ՏԵՍԱՆՅՈՒԹ
04.11.2026 | 13:51
«Երեմյան» ընկերությունների խմբի կաթնամթերքում խախտումներ կամ շեղումներ չեն հայտնաբերվել՝ հայտարարում է ընկերությունը՝ ներկայացնելով Հայաստանում միջազգային հավատարմագրում ունեցող երկու լաբորատորիաների փորձաքննությունների արդյունքները։
Վերջին շրջանում սպառողների շրջանում առաջացած անհանգստությունը հաշվի առնելով՝ ընկերությունը տեղեկացնում է, որ կրկնակի փորձաքննության են ենթարկել թթվասերի և կաթնաշոռի նմուշները։ Հոկտեմբերի 30-ին փորձաքննության են ներկայացվել 25 տոկոս յուղայնությամբ թթվասերի և 12 տոկոս յուղայնությամբ կաթնաշոռի պահուստային նմուշները։ Արդյունքներն ամփոփվել են նոյեմբերի 3-ին։
Սննդամթերքի անվտանգության տեսչական մարմինը ևս վերջին մեկուկես տարվա ընթացքում երեք ստուգում է իրականացրել ընկերությունում, որոնց արդյունքում դարձյալ որևէ խախտում չի հայտնաբերվել՝ հայտնում է «Երեմյան» ընկերությունների խումբը։ Հոկտեմբերի 30-ին փորձաքննության են ենթարկվել նաև պահուստային նմուշները, ևս մեկ միջազգային հավատարմագրում ունեցող լաբորատորիայի արդյունքներն ընկերությունն ակնկալում է առաջիկա օրերին։
Արտադրության ողջ շղթայում իրականացվում են որակի վերահսկողություն, նմուշառումներ, լաբորատոր ստուգումներ և մշտադիտարկում՝ ընդգծում են ընկերության ներկայացուցիչները։ Վերահսկվում են նաև հումքի ընդունումը, տեխնոլոգիական և ջերմաստիճանային ռեժիմները, սարքավորումների աշխատանքը, պահեստավորման պայմաններն ու անձնակազմի հիգիենան։
«Երեմյան ֆարմ» ընկերության լաբորատորիայի պատասխանատու Արմեն Մկրտչյանի խոսքով՝ գործարանի կենտրոնական լաբորատորիայում ամեն օր իրականացվում են կաթի և կաթնամթերքի ֆիզիկաքիմիական փորձաքննություններ՝ հումքի ընդունումից մինչև պատրաստի արտադրանք։
Ընկերությունը վերահաստատել է FSSC 22000 սննդի անվտանգության միջազգային սերտիֆիկատին իր համապատասխանությունը։ Սերտիֆիկացման և վերահսկողական աուդիտի գործընթացներն իրականացրել է միջազգային աուդիտորական Intertek SAI Global կազմակերպությունը։ Ընկերության հաղորդմամբ՝ աուդիտի արդյունքում ստացել է դրական գնահատական և համապատասխանության սերտիֆիկատ։
«Երեմյան» ընկերությունների խմբի արտադրությունն իրականացվում է ոչ միայն սննդամթերքի անվտանգության պետական և Եվրասիական տնտեսական միության տեխնիկական կանոնակարգերի, այլև միջազգային ստանդարտների պահանջներին համապատասխան։
Մանրամասները՝ տեսանյութում։
Արփի Հակոբյան
