04.11.2026 | 15:10
9 կյանք խլած վթարի պատճառը՝ նախնական վարկածով//7 մեղադրյալ՝ քոլեջում կաշառքի գործով․ ԼՈՒՐԵՐ
Զելենսկին Մելանյա Թրամփին պարգևատրել է Իշխանուհի Օլգայի շքանշանով
Քաղաքականություն
04.11.2026 | 14:25
Ուկրաինայի նախագահ Վոլոդիմիր Զելենսկին ԱՄՆ առաջին տիկին Մելանյա Թրամփին պարգևատրել է Իշխանուհի Օլգայի I աստիճանի շքանշանով։ Այս մասին հայտնում է ՌԲԿ Ուկրաինան՝ հղում անելով Զելենսկիի հրամանագրին։
Պարգևը շնորհվել է Ուկրաինային մարդասիրական աջակցության գործում ունեցած նշանակալի անձնական ավանդի, մարդու իրավունքների պաշտպանության և բարեգործական ակտիվ գործունեության համար, որոնք ուղղված են ուկրաինացի երեխաների փրկությանը, ռուսական ագրեսիայի հետևանքով տուժած, ինչպես նաև Ուկրաինայի՝ Ռուսաստանի կողմից ժամանակավորապես օկուպացված տարածքներից ապօրինի արտաքսված և բռնի տեղահանված քաղաքացիներին աջակցելուն։
Հիշեցնենք, որ Մելանյա Թրամփն աջակցել է Խերսոնի մարզի Օլեշկի քաղաքում մարդասիրական առաքելության իրականացմանը և հասել այդ շրջանում հրադադարի հաստատմանը՝ քաղաքի բնակիչների տարհանումն ապահովելու նպատակով։ Օլեշկիից տարհանվել է շուրջ 800 մարդ։
Բացի այդ, նոյեմբերի 5-ին Մելանյա Թրամփը Սպիտակ տանը կհանդիպի Ռուսաստանի և Ուկրաինայի ներկայացուցիչների հետ։ Նա նաև ելույթ կունենա՝ անդրադառնալով Օլեշկիում հաստատված հրադադարին։ Հանդիպմանը, ըստ տեղեկությունների, ուկրաինական կողմից կմասնակցեն «Ժողովրդի ծառա» խմբակցության ղեկավար Դավիթ Արախամիան և մարդու իրավունքների հանձնակատար Դմիտրի Լուբինեցը, իսկ ռուսական կողմից՝ Վլադիմիր Պուտինի հատուկ ներկայացուցիչ Կիրիլ Դմիտրիևը և օմբուդսմեն Յանա Լանտրաստովան։
Սպիտակ տանը սա անվանել են ԱՄՆ առաջին տիկնոջ աննախադեպ դիվանագիտական նախաձեռնություն։
Թարգմանությունը՝ Էմմա Չոբանյանի
