19.12.2025 | 16:49
Ինձ չեն ստիպել, ես եմ դիմում գրել, դուրս եկել. Աղազարյանի որդին՝ ՔՊ-ից և աշխատանքից դուրս գալու մասին․ ՏԵՍԱՆՅՈՒԹ
Պեսկովը հայտարարել է, որ զորակոչի որոշումը կայացվել է «հակամարտությանը ՆԱՏՕ-ի դե ֆակտո մասնակցության պատճառով»
Քաղաքականություն
22.09.2022 | 17:34
Պահեստազորին զորակոչելու որոշումը կայացվել է՝ ուկրաինական հակամարտությանը ՆԱՏՕ-ի «դե ֆակտո մասնակցության» պատճառով։ Այս մասին հայտարարել է ՌԴ նախագահի խոսնակ Դմիտրի Պեսկովը՝ պատասխանելով հարցին՝ արդյո՞ք մոբիլիզացիան ի սկզբանե մաս է կազմել ռազմական գործողություն իրականացնելու Ռուսաստանի ծրագրերին, գրում է Կոմերսանտը։
Միաժամանակ, նա նշել է, որ պատերազմի կարգավիճակը չի փոխվել՝ այն դեռ «հատուկ ռազմական գործողություն է» , ոչ թե պատերազմ։
Նշենք, որ սեպտեմբերի 21-ին Ռուսաստանում հայտարարվել է մասնակի մոբիլիզացիա, մինչդեռ սեպտեմբերի 13-ին Պեսկովը հայտարարել էր, որ նման միջոց չի դիտարկվում։
«Նախագահը երեկվա իր ելույթում հստակ նկարագրություն տվեց և բացատրեց նման որոշում կայացնելու պատճառները։ Փաստն այն է, որ հատուկ գործողությունը սկսվել է… Ուկրաինայում նպատակների իրականացման համար։ Այժմ, դե ֆակտո, մենք իրականում բախվում ենք ՆԱՏՕ-ի դաշինքին՝ իր ողջ նյութատեխնիկական հնարավորություններով: Դա հանգեցրեց նման անհրաժեշտության»,- ասել է Պեսկովը։
ՌԴ նախագահ Վլադիմիր Պուտինը երեկ իր մասնակի մոբիլիզացիոն ուղերձում հինգ անգամ հիշատակել է ՆԱՏՕ-ն։ Նա դաշինքին մեղադրել է «հարձակողական ենթակառուցվածքը» դեպի Ռուսաստանի սահմաններ տեղափոխելու մեջ, այն բանում, որ ուկրաինացի զինվորականները պատրաստվել են ՆԱՏՕ-ի չափանիշներին համապատասխան «և արևմտյան խորհրդականների փաստացի հրամանատարության ներքո՝ Ռուսաստանի Դաշնության հարավային շրջանների տարածքներում հետախուզության և Ռուսաստանին միջուկային զենքով սպառնալու մեջ»։
Ի պատասխան՝ նա սպառնացել է ՆԱՏՕ-ի երկրներին օգտագործել «ձեռքի տակ եղած բոլոր միջոցները»՝ ընդգծելով, որ «սա բլեֆ չէ»։
Տաթև Ֆռանգյան
