Ես ինքս էլ սրտացավ եմ Միքայել Արզումանյանի համար․ Անդրանիկ Քոչարյան․ ՏԵՍԱՆՅՈՒԹ

«Միքայել Արզումանյանի փայլուն զինվորական լինելու մասին որևէ մեկը կասկած չի հարուցել»,- այսօր լրագրողների հետ զրույցում նշեց ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանը:

«Արզումանյանին 90-ականներից հիշում են այն ժամանակվա հրամանատարները, ընդհուպ մինչև Սամվել Բաբայան: Նրա մեղադրանքը այլ բովանդակության է: Տա Աստված, այդ մեղադրանքները դատարանում հերքվեն»,- նշեց Քոչարյանը:

Նրա խոսքով՝ԱԺ  44-օրյա պատերազմի քննիչ հանձնաժողովում բազմաթիվ փաստաթղթեր կան, որոնք հետո կհանրայնացվեն, կդառնան հանրության համար հասանելի: « Ես ինքս էլ սրտացավ եմ Միքայել Արզումանյանի համար… Բայց եթե կան սխալներ, որոնք բերել են տարածքային ու մարդկային կորուստների, դա պետք է քննվի և քննության արդյունքները պետք է լինեն փաստարկված և հաստատված»:

Անդրադառնալով Ջալալ Հարությունյանին առնչվող դիտարկմանը, որ նա չի ընդունում իր մեղադրանքը՝ Քոչարյանը նկատեց, որ պատմության մեջ այդպիսի դեպք հայտնի չէ, որ մեղադրվողն ընդունի մեղադրանքը:

«Խնդիրը դասեր քաղելու մասին է: Միայն տարբերակել, որ Ջալալ Հարությունյանը, Արզումանյանը ունեն գեներալի կոչում… եթե որևէ մեկը իր որոշումների արդյունքում ունեցել է սխալներ, որոնք մարդկային ճակատագրեր են արժեցել, պետք է քննել:

Ոչ մեկը չի կարող հերքել, ուրանալ նրանց անցած ուղիները, բայց այդ ճոճանակն այնպես է շարժվել, որ պետք է հստակություն մտցնել ու հասարակության մեջ թույլ չտանք, որ շահարկումները դառնան օրակարգային խնդիրներ»- ընդգծեց Քոչարյանը:

Մանրամասները՝ տեսանյութում։