29.04.2026 | 20:30
Քոչարյանը խանգարում է Սամվել Կարապետյանին, օգնում՝ Փաշինյանին․ Կարապետյանի մոտ չկա՞ այդ ընկալումը․ Նորայր Նորիկյան. ՏԵՍԱՆՅՈՒԹ
Վկան չէր ներկայացել․ քննությունը հետաձգվեց 49 օրով
Հասարակություն
29.08.2022 | 21:08
Այսօր Կոտայքի մարզի ընդհանուր իրավասության դատարանի Աբովյանի նստավայրում պետք է շարունակվեր ընտանեկան բռնության գործերից մեկի քննությունը։ Դատաքննությունը, սակայն, չկայացավ, քանի որ գործով անցնող վկան չէր ներկայացել դատական նիստին։ Թեև դատարան ներկայանալու ծանուցագիրը վկային փոխանցելը փորձել էին կազմակերպել ոստիկանության միջոցով, հնարավոր չէր եղել ապահովել վկայի ներկայությունն այսօրվա նիստին։
Այցելելով իրենց հայտնի հասցեն՝ ոստիկանները պարզել են, որ վկան այլևս այդտեղ չի բնակվում։ Դատավոր Գոռ Շահբազյանը նիստի սկզբում հայտարարեց, որ վկային բերման ենթարկելու հիմքերը բացակայում են, քանի որ առկա չէ պատշաճ ծանուցում։ Ամբաստանյալ Ա․ Մ․-ն հայտարարեց, որ կարելի է շարունակել քննությունն առանց տվյալ վկային հարցաքննելու, քանի որ վերջինիս ցուցմունքներում, իր խոսքով, չնչին են հակասությունները։
Մեղադրող դատախազն էլ իր հերթին նշեց, որ պետք է ևս մեկ անգամ փորձել ոստիկանության միջոցով ծանուցել վկային, իսկ եթե դա չհաջողվի, պետք է քննարկել առանց վկայի մասնակցության գործի քննությունը շարունակելու հարցը։
Դատավորը որոշում կայացրեց ևս մեկ անգամ ոստիկանության միջոցով վկային ծանուցել հաջորդ դատական նիստի վերաբերյալ և դատաքննությունը հետաձգեց 49 օրով։ Դատավոր Շահբազյանը նշեց, որ հաջորդ նիստը ստիպված է նշանակել հոկտեմբերի 17-ին՝ դատարանի ծանրաբեռնվածության պատճառով։
Հիշեցնենք, որ Ա․Մ․-ին մեղադրանք է առաջադրվել այն բանի համար, որ նա խախտել է «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգման մասին» ՀՀ օրենքի պահանջները, մասնավորապես չի ենթարկվել ոստիկանության կայացրած անհետաձգելի միջամտության որոշմանը և մոտեցել է նախկին կնոջը, որի իրավունքը չուներ։
Նշենք, որ Ոստիկանությունն անհետաձգելի միջամտության որոշում կայացնում է՝ ելնելով ընտանեկան բռնության կրկնության հավանականությունից։
Factor.am-ը գրել էր, որ մեղադրյալն ու տուժող կինը համատեղ 5 երեխա ունեն, որոնք բոլորն էլ բնակվում են մոր ու մորական տատիկի մոտ։ Դատարանում ցուցմունք է տվել նաև մեղադրյալի զոքանչը, որը պատմել է, որ փեսայի կողմից հաճախակի են եղել բռնությունները, հատկապես երբ նա ալհոկոլ է օգտագործել։ «Մի անգամ էրեխեն զանգեց ինձ, ասեց՝ տատի՛, շո՛ւտ արա, պապան մամային սպանում ա․․․», ես եմ այդ օրը զանգել ոստիկանություն։
Ծխախոտը հանգցրել է աչքի տակ, թքել է աղջկաս վրա»,- դատարանում պատմել է տուժողի մայրը։
Նշենք, որ Ա․Մ․-ին առաջադրված մեղադրանքով՝ ՀՀ քրեական օրենսգրքի 353․1 հոդվածով, նախատեսված է տուգանք` 400-600 հազար ՀՀ դրամի չափով, կամ կալանք` մեկից երեք ամիս ժամկետով, կամ ազատազրկում՝ առավելագույնը երկու տարի ժամկետով:
Ընտանեկան բռնության այլ գործերի քննության մասին Factor.am-ի նյութերին ծանոթացեք հետևյալ հղումներով՝
Կնոջ նկատմամբ մահափորձ իրականացրած ամուսինը դատապարտվեց 8 տարվա ազատազրկման
600,000 դրամ տուգանք․ բռնության ենթարկված կինը դժգոհ է դատավճռից
Դատաքննությունը սկսվեց և ավարտվեց մեկ օրում․ բռնարար տղամարդը մեղավոր ճանաչվեց
Արման Ղարիբյան
Նկարազարդումը՝ Ելենա Ակոջյանի
