24.03.2026 | 14:13
Պարսից ծոցի երկրները համոզել են Թրամփին՝ չհարվածել Իրանի էներգետիկ ոլորտին. Bloomberg
«Ինչ էր գրելու Մեսրոպ Մաշտոցը, եթե համացանց ունենար». ապոլիտիկ զրույց Մարի Լու Փափազյանի հետ. ՏԵՍԱՆՅՈՒԹ
Հաղորդաշարեր
21.05.2022 | 21:02
Factor TV-ի A-politic հաղորդաշարի հյուրն է «Թումո» ստեղծարար տեխնոլոգիաների կենտրոնի գործադիր տնօրեն Մարի Լու Փափազյանը: Նրա կարծիքով՝ թվային տեխնոլոգիաները դարձել են երեխաների (նախադպրոցական տարիքից սկսած) կյանքի անբաժանելի մասը, և այդ իրողության դեմ հնարավոր չէ պայքարել, պետք է օգտագործել՝ ի շահ գիտելիքի: Չարժե երեխաներին այս հարցերում մշտապես ասել «ոչ», մյուս կողմից՝ խելամտության սահմաններում իմաստ կա սահմանափակել նրանց:
Ո՞րն է դպրոցի, ուսուցչի դերը, եթե համացանցում հնարավոր է գտնել տեղեկություններ ցանկացած թեմայով և անվճար ուսուցողական ծրագրերի պակաս չկա: Պատասխանելով այս հարցին՝ «Թումո»-ի տնօրենը նշում է, որ ուսուցչի առաքելությունն է՝ ուղղություն ցույց տալ, թե որտեղ պետք է փնտրել գիտելիքը, բորբոքել աշակերտի երևակայությունը, իսկ հետո ստուգել, թե ինչպես է առաջադրանքը կատարվել, անհրաժեշտության դեպքում՝ շտկումներ մտցնելով:
Անդրադառնալով նոր մեդիային՝ հաղորդման հյուրը կարծիք է հայտնում, որ իմաստ կա ուսումնասիրել ոչ թե այս կամ այն սոցիալական հարթակը, այլ հնարավորությունները, որոնք ստեղծում է մարդկանց շփումը: Տիկին Փափազյանը հիշում է, որ դեռևս 1997 թվականին ծրագիր է իրականացրել Հայաստանի և Սփյուռքի երեխաների համար, որտեղ մասնակիցները հանդես էին գալիս որպես տարբեր ժամանակների պատմական դեմքեր, օրինակ՝ պատկերացնում էին, թե ինչպես կարող էր Մեսրոպ Մաշտոցը շփվել Շառլ Ազնավուրի հետ, ինչ էր հայ գրերի գյուտի հեղինակը գրելու, եթե համացանց ունենար: Դա հայ երեխաներին միավորելու առանձնահատուկ ծրագիր էր:
Մանրամասները՝ տեսանյութում:
