25.08.2026 | 14:30
Ինչու էին խուզարկում Լևոն Քոչարյանի տունը և ինչ տարան․ ՏԵՍԱՆՅՈՒԹ
Աղքատ կարող է համարվել ՀՀ ամեն 5 բնակչից 2-ը․ աղքատությունը մարդկանց գլխո՞ւմ է, թե՞ կան այլ պատճառներ. ՏԵՍԱՆՅՈՒԹ
Տնտեսություն
02.05.2022 | 18:32
Որքա՞ն գումար է պետք ընտանիքին Հայաստանում նորմալ ապրելու համար։ Երևանում մեր արած հարցման ընթացքում խիստ տարբեր կարծիքներ լսեցինք․ մեկ ամսում 90 հազար դրամից մինչև միլիոններ։
Համաշխարհային բանկը նորմալ ապրելու մասին իր պատկերացումներն ունի։ Օրերս կառույցի հրապարակած վերլուծությունում կանխատեսվում է, որ 2022 թվականի արդյունքներով՝ Հայաստանի ամեն 5 բնակչից 2-ը կարող է աղքատ համարվել։
«Ելնելով կանխատեսվող մակրոտնտեսական ազդեցությունից՝ Հայաստանում աղքատության ցուցանիշը 2022 թվականին կարող է հասնել բնակչության 39․6%-ի մակարդակին, ինչը 3 տոկոսային կետով բարձր է նախորդ կանխատեսման համեմատ։ Խոցելիությունը կարող է աճել՝ պայմանավորված դրամական փոխանցումների նվազմամբ, կոմունալ վճարների բարձրացմամբ և սննդամթերքի գների աճով»,- նշվում է փաստաթղթում։
Համաշխարհային բանկի վերլուծությունում նշվում է, որ ավելի հեռուն կանխատեսելը դժվար է, և իրավիճակը կախված է լինելու Ուկրաինայի պատերազմի տևողությունից, Ռուսաստանի տնտեսության դանդաղումից, ինչպես նաև տարածաշրջանի խնդիրներից։ Իսկ դրական ազդեցություն կարող է ունենալ ռուսաստանցիների հոսքը Հայաստան։
ՀՊՏՀ վիճակագրության ամբիոնի վարիչ, տնտեսագետ Արմեն Քթոյանը բացատրում է, որ Հայաստանում աղքատությունը քրոնիկ խնդիր է, եղել է անգամ Խորհրդային Միության տարիներին։ Քթոյանի խոսքով՝ միայն 2000-ականների առաջին կեսին աղքատությունը սկսեց դիտարկվել որպես խնդիր, և մշակվեցին ռազմավարություններ, բայց այն ժամանակ էլ ոչ բոլոր խնդիրները լուծվեցին, եղածներին էլ ավելացան նորերը։
«Հայաստանը հիմա բավականին բարդ ժամանակահատվածում է ապրում։ Ունենք, ունեցել ենք լրջագույն մարտահրավերներ՝ համավարակ, պատերազմ, հիմա էլ՝ նոր պատերազմական իրողություններ։ Այս ամենը, բնականաբար, հարվածում է բնակչության եկամուտներին, բնակչության սպառմանը, ինչն աղքատության նոր ալիք է իր հետ բերում»,- նշում է Քթոյանը։
Գործող կառավարության նախընտրական ծրագիրը, որով «Քաղաքացիական պայմանագիր» կուսակցությունը գնացել է 2021 թվականի ընտրություններին, խոստանում է աղքատության մակարդակը կրկնակի նվազեցնել մինչև 2026 թվականը։ Կառավարության ղեկավար Նիկոլ Փաշինյանն էլ, ինչպես հայտնի է, աղքատության մասին ավելի ռադիկալ պատկերացումներ ունի։
«Աղքատությունը միայն զուտ տնտեսական հարաբերությունների հետ կապված բան չէ: Մարդու աղքատությունն առաջին հերթին գլխում է: Որևէ մարդ, որն իր մտքում աղքատությունը չի հաղթահարել, ինչ ուզում ես՝ արա, չի հաղթահարի. տար ամեն օր հազար, հարյուր հազար դոլար տուր, եթե ինքն իր գլխում աղքատությունը չի հաղթահարել, չի հաղթահարի»,- ասում էր Փաշինյանը 2019-ին։
Տնտեսագետ Արմեն Քթոյանը խնդիրը ներկայացնում է այլ տեսանկյունից։ Մարդն իր անելիքն ունի, բայց առանց պետության դժվար թե հաջողի դուրս գալ աղքատության փոսից։ Պետությունը, ըստ այդմ, պետք է նպաստներին ու ֆինանսական օգնությանը զուգահեռ՝ օգնի աղքատ ընտանիքների երեխաներին ավելի լավ կրթություն ունենալ։
Մանրամասները՝ տեսանյութում։
Գարիկ Հարությունյան
