Բաքվում շինծու գործերով դատական նիստում Դավիթ Մանուկյանը հարցաքննվել է, խոսել Ռուբեն Վարդանյանից

Բաքվի զինվորական դատարանում, դատավոր Զեյնալ Աղաևի նախագահությամբ, այսօր տեղի է ունեցել Արցախի ղեկավարների և պաշտոնյաների շուրջ 15 անձի նկատմամբ հարուցված շինծու գործերով հերթական դատական նիստը։ Ադրբեջանական լրատվամիջոցների հաղորդմամբ՝ Արցախի ՊԲ նախկին հրամանատարի առաջին տեղակալ, գեներալ-մայոր Դավիթ Մանուկյանը հարցաքննվել է պետական ​​մեղադրանքը պաշտպանող դատախազների կողմից:

Դավիթ Մանուկյանն ասել է, որ ՀՀ նախագահ Արմեն Սարգսյանի հրամանով իրեն գեներալ-մայորի կոչում է շնորհվել։ Ավելի ուշ նա նշանակվել է հրամանատարի առաջին տեղակալ Արցախի բանակում։ Նա հայտարարել է, որ այս պաշտոնում եղել է 2020 թվականի 44-օրյա պատերազմի ժամանակ և հանձնարարականներ է ստացել պաշտպանության նախարար Ջալալ Հարությունյանից։

Պատասխանելով դատախազ Տարանա Մամեդովայի հարցերին՝ Մանուկյանը խոսել է նաև Ռուբեն Վարդանյանի հետ իր հարաբերությունների մասին, որը նույնպես ներկայում ապօրինի պահվում է Ադրբեջանում բանտում։ Նա ասել է, որ Վարդանյանը 2023 թվականի սեպտեմբերի 27-ին ձերբակալվել է իր մեքենայով։

«Հինգ հոգով էինք, զրուցում էինք, Վարդանյանն էլ այնտեղ էր, հարցրի՝ ի՞նչ եք անելու։ Նա հարցրեց՝ իր մեքենայում տեղ կա՞։ Ես ասացի՝ «հարևանն էլ է ուզում մեզ հետ գալ»։ Զանգահարեցի կնոջս ու հարցրի՝ վստա՞հ է, որ հարևանը կգա, նա ասաց՝ «ոչ, որդին գտել է մեքենա»: Վարդանյանին ասացի, որ մեքենայի մեջ տեղ կա։ Հետո մեզ կանգնեցրին Լաչինի սահմանային անցակետում»,- պատմել է Դավիթ Մանուկյանը։

Հաջորդ դատական ​​նիստը նշանակվել է ապրիլի 7-ին։

Թարգմանությունը՝ Էմմա Չոբանյանի