08.06.2026 | 18:54
ՔՊ-ի կողմից ճնշումների ու խրախուսումների վերաբերյալ ահազանգեր ենք ստացել․ ԵՄ հանձնակատար․ ՏԵՍԱՆՅՈՒԹ
ՔՊ-ում ստորագրահավաք են իրականացրել՝ նախագահի թեկնածու առաջադրելու համար
Քաղաքականություն
31.01.2022 | 19:33
Այսօր խորհրդարանում տեղի է ունեցել «Քաղաքացիական պայմանագիր» խմբակցության փակ նիստը։ Factor TV-ն տեղեկացավ, որ ի թիվս այլ հարցերի, քննարկվել է ՀՀ նախագահի թեկնածու առաջադրելու հարցը։
Պատգամավորները նաև ստորագրահավաք են իրականացրել՝ նախագահի թեկնածու առաջադրելու համար։
Նշենք, որ Սահմանադրության համաձայն՝ ԱԺ խմբակցության առնվազն 27 անդամ կարող է նախագահի թեկնածու առաջադրել։ Թեև իշխանական պատգամավորներն այսօր Factor TV-ի հետ զրույցում չէին շտապում հնչեցնել նախագահի թեկնածուի անունը՝ հորդորելով սպասել մինչև վաղը, բայց և նրանց խոսքից պարզ դարձավ, որ որպես հնարավոր թեկնածուներ քննարկվել են մի շարք անձանց, այդ թվում՝ վարչապետի աշխատակազմի ղեկավար Արայիկ Հարությունյանի և ԲՏԱ նախարար Վահագն Խաչատրյանի անունները։
Հիշեցնենք, որ օրեր առաջ մամուլում տարածվեց, որ ՔՊ-ի նախագահի թեկնածուն Արայիկ Հարությունյանն է։ Իսկ երեկ ՀԺ-ն գրել էր, որ նախագահի՝ իշխող ուժի թեկնածուն Վահագն Խաչատրյանն է։ Այսօր՝ մինչև օրվա վերջ, նախագահի պաշտոնից հրաժարական ներկայացրած Արմեն Սարգսյանը կարող է դիմումը հետ վերցնել։ Ինչպես մեզ հետ զրույցում ասաց ԱԺ նախագահի խոսնակ Ծովինար Խաչատրյանը՝ եթե դա տեղի չունենա, վաղն առավոտյան կհրապարակվի նախագահի պաշտոնաթողության վերաբերյալ արձանագրությունը։ Հիշեցնենք, որ Սարգսյանը հրաժարական էր ներկայացրել նախորդ կիրակի՝ հունվարի 23-ին։ Մերի Մարտիրոսյան
