Քաղաքականություն
25.12.2021 | 18:00Ազգային ժողովի աշխատակազմը հազարավոր դոլարների վերանորոգումներ և գնումներ է իրականացնում: Դեռևս դեկտեմբերի 8-ին արձանագրել էինք, որ խորհրդարանում նոր ուղեգորգեր են փռվել։ Գնումների պետական համակարգից պարզեցինք, որ խորհրդարանը դրանց համար վճարել է 12 միլիոն դրամ կամ 25 հազար դոլար: Ընդհանուր 861 գորգ է ձեռք բերվել, որոնք ԱԺ-ին մատակարարել է «Արմկարպետ» ՍՊԸ-ն:
Պարզվում է՝ Ազգային ժողովում գորգերը հաճախակի են թարմացնում: Նույն ընկերությունից 21 մլն դրամի գորգ էլ 2018 թվականի մայիսին է ձեռք բերվել՝ երկու տարբեր պայմանագրերով:
«Արմկարպետ» ՍՊԸ-ին պատկանող գույքը, ի դեպ, արգելանքի տակ է: Այս մասին Factor TV-ն տեղեկացավ իրավաբանական անձանց պետական ռեգիստրից: Արգելանքը դրվել է երկու ամիս առաջ:
Նշենք, որ ԱԺ-ի աշխատակազմը, միայն այս տարի 25 հազար դոլարի գորգ գնելուց զատ, ևս 25 հազար դոլարի կամ 12 մլն դրամի շրջանակում Ազգային ժողովի շենքի պարիսպների վերանորոգման աշխատանքներ է իրականացնում:
Վերանորոգման աշխատանքների շրջանակում թարմացվում է քարե պարսպի գույնը, ներկվում են ճաղավանդակները: Ծառայությունները մատուցում է «Հիպերնովա» ՍՊԸ-ն: Իրավաբանական անձանց պետական ռեգիստրից տեղեկանում ենք, որ այս ընկերությունը հիմնադրվել է հեղափոխությունից հետո՝ 2019 թվականին, իսկ ահա Գնումների պետական համակարգից էլ պարզում ենք, որ 2020 թվականից այս ընկերությունը սկսել է պետական կառույցներին ծառայություններ մատուցել:
«Հիպերնովա» ՍՊԸ-ն մեկ այլ պայմանագրով էլ ևս 38 մլն դրամի ծառայություններ է մատուցել Ազգային ժողովին. վերանորոգել է ԱԺ տնտեսական շինությունները, ևս շուրջ 23 մլն դրամի շրջանակում ԱԺ ավտոտնտեսության հատակն է ասֆալտապատել:
Այսպիսով՝ ստացվում է, որ ԱԺ-ի աշխատակազմը 50 հազար դոլար է ծախսել միայն գորգերի գնման և պարիսպների ներկման աշխատանքների համար:
Ազգային ժողովում նաև տեսահսկման համակարգ է տեղադրվել, որի համար վճարվել է շուրջ 25 մլն դրամ: Մատակարարը «ՋԻ ԷՍ ՍԻ» ընկերությունն է:
Հիշեցնենք, որ ԱԺ-ն վերջերս քննադատությունների կենտրոնում էր հայտնվել մեկ այլ շքեղ ձեռքբերման պատճառով․ ԱԺ նախագահ Ալեն Սիմոնյանը Նիկոլ Փաշինյանին խնդրել էր 200 հազար դոլարով իրեն սպասարկող նոր BMW գնել, ինչը Փաշինյանի կողմից չէր մերժվել:
Ճոխ գնումները զուգորդվում են նաև ճոխ պարգևավճարներով։ Մեկ ամսվա աշխատավարձի չափով պարգևատրվել է շուրջ 700 աշխատակից, այդ թվում՝ 107 պատգամավոր: Այս գումարն ընդհանուր առմամբ կազմել է 142 միլիոն դրամ կամ 293 հազար դոլար: Ավելի վաղ էլ հայտնէլ էինք, որ Ալեն Սիմոնյանի կարգադրությամբ այս պարգևատրումը երկրորդն է՝ ընդամենը հինգ ամիս ԱԺ նախագահի պաշտոնը զբաղեցնելու ընթացքում: Նախորդ պարգևավճարը պատգամավորներին բաժանվել էր Հայաստանի Անկախության 30-ամյակի առթիվ:
Այս գնումներն ու պարգևավճարներն իշխանություններն անում են Հայաստանում առկա գնաճի և սոցիալական բազմաթիվ չլուծված խնդիրների ֆոնին:
Նարեկ Կիրակոսյան
