16.09.2026 | 23:17
Գեղարքունիքի մարզի մի շարք հասցեներում 24 ժամ ջուր չի լինի
Սպիտակ տունը հայտարարել է, որ ԱՄՆ-ն առանց ԵՄ գործընկերների չի բանակցի Եվրոպայում անվտանգության հարցերի շուրջ
Քաղաքականություն
17.12.2021 | 19:51
Միացյալ Նահանգները խորհրդակցություններ չի սկսի Եվրոպայում անվտանգության հարցերով՝ Եվրամիության գործընկերների բացակայության դեպքում։ Այս մասին հայտարարել է Սպիտակ տան մամուլի խոսնակ Ջեն Փսակին, գրում է ՏԱՍՍ գործակալությունը։
Նրան խնդրել են մեկնաբանել ՌԴ ԱԳՆ-ի՝ Ռուսաստանի և ԱՄՆ-ի ու ՆԱՏՕ-ի միջև Եվրոպայում անվտանգության երաշխիքների մասին պայմանագրերի նախագծերի հրապարակումը։
«Նշեմ, որ առանց մեր եվրոպացի դաշնակիցների ու գործընկերների՝ բանակցություններ չեն տարվելու եվրոպական անվտանգության վերաբերյալ։ Մենք զիջումների չենք գնա այն հիմնական սկզբունքների հարցում, որոնց վրա հիմնված է եվրոպական անվտանգությունը, ներառյալ՝ այն փաստը, որ բոլոր երկրներն իրավունք ունեն ինքնուրույն որոշել իրենց ապագան և արտաքին քաղաքականությունը՝ առանց արտաքին միջամտության»,- ասել է Փսակին։
Նա հիշեցրել է, որ ԱՄՆ պետքարտուղարի Եվրոպայի և Եվրասիայի հարցերով օգնական Քարեն Դոնֆրիդն այս շաբաթ ավելի վաղ այդ հարցերը Բրյուսելում քննարկել է ՆԱՏՕ-ում ԱՄՆ-ի դաշնակիցների հետ։ Փսակին նաև հավելել է, որ ԱՄՆ նախագահի ազգային անվտանգության հարցերով խորհրդական Ջեյք Սալլիվանն էլ «Բուխարեստի 9-յակի» երկրների (Բուլղարիա, Հունգարիա, Լատվիա, Լիտվա, Լեհաստան, Սլովակիա, Ռումինիա, Չեխիա և Էստոնիա) ներկայացուցիչների հետ հեռախոսազրույցներում նույնպես անդրադարձել է այդ թեմային։
Էմմա Չոբանյան
