Մեծ Բրիտանիան ողջունում է Հարավային Կովկասում խաղաղության հաստատման ուղղությամբ արձանագրված առաջընթացը
Քաղաքականություն
17.11.2026 | 14:42
Որպես վաղեմի բարեկամներ և ռազմավարական գործընկերներ՝ Մեծ Բրիտանիան և Ադրբեջանն այսօր նման դիրքորոշումներ ունեն աշխարհի առջև ծառացած բազմաթիվ մարտահրավերների վերաբերյալ և համատեղ աշխատում են դրանք հաղթահարելու ուղղությամբ: Ադրբեջանական լրատվամիջոցների հաղորդմամբ՝ այս մասին մամուլի ասուլիսի ժամանակ հայտարարել է Ադրբեջանում Մեծ Բրիտանիայի դեսպան Դունկան Նորմանը։
«Ուկրաինայի ինքնիշխանության և տարածքային ամբողջականության հարցում մեր դիրքորոշումները համընկնում են։ Մենք ողջունում ենք Ուկրաինային Ադրբեջանի կողմից ցուցաբերվող հետևողական աջակցությունը։ Մեծ Բրիտանիան կշարունակի անսասան աջակցություն ցուցաբերել Ուկրաինային»,- հայտարարել է դեսպանը։
Նա նաև ասել է, թե երկու երկրներն էլ շահագրգռված են, որպեսզի Իրանում հակամարտությունը դադարեցնելու և համաշխարհային տնտեսության համար կենսական նշանակություն ունեցող Հորմուզի նեղուցով նավագնացությունն ամբողջությամբ վերականգնելու նպատակով իրականացվող դիվանագիտական ջանքերը արդյունք տան։
«Մենք շարունակում ենք մեր գործընկերների հետ աշխատել լարվածության թուլացման և նեղուցի լիարժեք բացման ուղղությամբ։ Ինչ վերաբերում է մեզ ավելի մոտ գտնվող Հարավային Կովկասին, ապա մենք ողջունում ենք վերջին մեկ տարվա ընթացքում խաղաղության հաստատման ճանապարհին արձանագրված առաջընթացը։ Դրան են վերաբերում «Խաղաղության կամուրջ» նախաձեռնությունը, սահմանների սահմանազատման գործընթացը, Ադրբեջանից Հայաստան վառելիքի մատակարարումները, ինչպես նաև AzerTelecom-ի և Telecom Armenia-ի միջև համաձայնագիրը։ Կայուն և երկարատև խաղաղություն ապահովելու համար չափազանց կարևոր է երկխոսության և համագործակցության միջոցով պահպանել այս դինամիկան»,- ընդգծել է բրիտանացի դիվանագետը։
Մեծ Բրիտանիայի դեսպանը նշել է, որ այն պայմաններում, երբ Հարավային Կովկասը վստահորեն շարժվում է դեպի ավելի խաղաղ ապագա, «Մեծ Բրիտանիայի և Ադրբեջանի միջև գործընկերությունը ձեռք է բերում աննախադեպ կարևորություն»։
Թարգմանությունը՝ Էմմա Չոբանյանի

