07.12.2025 | 21:40
Վարդենյաց լեռնանցքում ձյուն է տեղում. Դիլիջանի, Սպիտակի ոլորաններում մառախուղ է
Հայկ Մարությանին պաշտոնանկ անելու գործընթացին ավագանու իմքայլական անդամների մի մասը դեմ է․ քաղաքապետն իր պարտականությունները կատարել է
Քաղաքականություն
15.12.2021 | 20:49
Երևանի ավագանու «Իմ քայլը» խմբակցությունում գործող քաղաքապետ Հայկ Մարությանին անվստահություն հայտնելու եղանակով պաշտոնանկ անելու գործընթաց է սկսվել։ Տեղեկությունը Factor.am-ի հետ զրույցում հաստատեց ավագանու «Իմ քայլը» խմբակցության անդամ Գրիգոր Երիցյանը։
«Ես տեղյակ եմ, որ նման բան է նախաձեռնվել, բայց անձամբ այդ գործընթացին չեմ մասնակցում։ Ես ասել եմ, որ դեմ եմ նման գործելաոճին ու չեմ ստորագրել՝ Մարությանին անվստահություն հայտնելու համար։ Ես կարծում եմ, որ Մարությանն իր պարտականությունները կատարել է և հանրությունը գոհ է իր աշխատանքից»,- շեշտեց Երիցյանը։
Ստացվում է, որ քաղաքապետին պաշտոնից հեռացնելու հարցում ավագանու իշխանական խմբակցությունում միասնական մոտեցում չկա։
Նշենք, որ նախնական տվյալներով՝ ավագանու «Իմ քայլը» խմբակցության 60 անդամներից 48-ն են ստորագրահավաքին մասնակցել։
Հարցի շուրջ մեկնաբանություն ստանալու նպատակով դիմեցինք քաղաքապետի խոսնակ Հակոբ Կարապետյանին։ Նա փոխանցեց, որ տեղեկություն չունի վերոնշյալ գործընթացի վերաբերյալ։
Մերի Մարտիրոսյան
