Քաղաքացիական պատերազմ չէ, բայց բախումներ կարող են լինել տարբեր տաքարյուն խմբերի միջև․ Էդգար Վարդանյան․ ՏԵՍԱՆՅՈՒԹ

Վերլուծաբան Էդգար Վարդանյանի հետ Factor TV-ի տաղավարում զրուցել ենք նախընտրական քարոզչության ընթացքում ատելության խոսքի, ատելության դրսևորումների, միմյանց հասցեին հայհոյանքների և այս մթնոլորտի հաղթահարման մասին

–Պարո՛ն Վարդանյան, որո՞նք են ատելության այս դրսևորումների վտանգները։

-Նախևառաջ, ժողովրդավարական հասարակությանն ամենամեծ վնաս հասցնող երևույթներն են, մանավանդ՝ ատելության խոսքը։ Իհարկե, ուղղակի վիրավորանքը նույնպես շատ բացասական երևույթ է։ Այն առաջացնում է լարվածություն, պղտորում է մթնոլորտը։ Այն խոչընդոտում է իրական բանավեճի իրականացմանը։ Երբ մարդիկ սկսում են իրար հայհոյել, այստեղ արդեն բանավեճ չի կարող լինել։

–Որքանո՞վ է մեծ վտանգը, որ սա կարող է վերաճել ֆիզիկական բախումների, ծեծի, հետապնդումների։

-Հիմնական վատ արդյունքը կամ հետևանքը, որ կարող է լինել ատելության խոսքի դեպքում, հենց այն է, որ տարբեր շերտեր կարող են այդ ատելության խոսքից ոգևորվել այն առոuմով, որ ստանան ազդակ՝ կոնկրետ գործողություններն անելու ատելության առարկայի՝ թիրախի նկատմամբ։

Հատկապես վտանգավոր է հենց ատելության խոսքը, որովհետև այն ուղղված է կոնկրետ խմբերի, կոնկրետ հատկանիշով։ Եվ կարող են լինել մարդիկ, որոնք ըստ այդ հատկանիշի մարդկանց նկատմամբ արդեն կոնկրետ բռնի գործողություններ իրականացնեն։

–Հայաստանում կա՞ ծայրահեղ բևեռացում, որ կարող է բերել բախումների։

-Իմ կարծիքով՝ եթե այդ հակադիր խմբերը մեկտեղ են հայտնվում` հակադիր կոչերով, գերլարված, էմոցիոնալ մթնոլորտում, կա վտանգ, որ կարող են առաջանալ որոշակի բախումներ։

Շատերն ասում են, որ այնպիսի մթնոլորտ է, որ քաղաքացիական պատերազմ կարող է լինել։ Հնարավոր չէ պատկերացնել, որ ինչ-որ փոքրամասնություն մեծամասնության դեմ․․․ դա արդեն քաղաքացիական պատերազմ չէ, բայց բախումներ կարող են լինել տարբեր խմբավորումների միջև, տարբեր քաղաքացիների, տաքարյուն մարդկանց միջև։

Հարցազրույցն ամբողջությամբ՝ տեսանյութում։

Գարիկ Հարությունյան