Համավարակի սկզբում ՀՀ իշխանությունները թերի, իրար հակասող հայտարարություններով իրավիճակը վատթարացրին. ՏԵՍԱՆՅՈՒԹ

Առողջապահության համակարգը Հայաստանում ընդհանրապես լավ անուն չունի դրա պատճառները տարբեր են թերի ֆինանսավորում և այլն»,- այսօր առցանց քննարկման ժամանակ ասաց անկախ հետազոտող Արթուր Պապյանը:

Նա իր այլ գործընկերների հետ  Freedom House իրավապաշտպան հասարակական կազմակերպության աջակցությամբ իրականացրել է հետազոտություն՝ նվիրված ապատեղեկատվությանն ու կեղծ պատմույթներին։ Հետազոտությունը բաղկացած է 4 գլուխներից՝ Կորոնավիրուսի համաճարակ, Լեռնային Ղարաբաղի երկրորդ պատերազմ, Ժողովրդավարություն ու սոցիալ-մշակութային հարցեր:

Նրա խոսքով՝ համավարակի հետ կապված հիմնականում ապատեղեկատվությունը հայաստանյան լրատվական դաշտ էր հոսում ռուսական աղբյուրներից: Այդ ապատեղեկատվությունն էլ խորանում էր Հայաստանի իշխանությունների՝ իրար հակասող հայտարարություններով:

Ըստ Արթուր Պապյանի, և համակարգի նկատմամբ անվստահությունը բերեց նրան, որ պանդեմիան Հայաստանում վերածվեց ինֆոդեմիայի:

«Ասում էին՝ «կորոնավիրուսն ում շունն է» կամ՝ դիմակներ պետք են, պետք չեն: Արտակարգ իրավիճակների քայլերն էին ոչ լիարժեք, սահմանվում էին չափից դուրս խիստ կարգավորումներ, ոստիկաններն այցելում էին մարդկանց բնակարաններ և պահանջում էին ֆեյսբուքյան գրառումներ հեռացնել և այլն, բայց իշխանությունն ի վիճակի չէր լինում այդ ամենին հետևելու: Այս ամբողջը ստեղծեց իշխանություն-հասարակություն հարաբերություներում լարվածություն»,- ասաց Արթուր Պապյանը:

Նա հիշեցրեց նաև կոճապղպեղի, բանանի, 5 G-ի շուրջ շրջանառվող միֆերը՝ երբ առաջինի դեպքում շուկայում դեֆիցիտ առաջացավ, բանանի դեպքում կեղծ տեղեկատվություն տարածվեց, թե կորոնավիրուսը դրա միջոցով է տարածվում, իսկ 5 G-ի դեպքում ինչպես են պատրաստվում մարդկանց չիպավորել:

Արթուր Պապյանի խոսքով՝ իշխանությունները ինֆորմացիոն վակում էին ստեղծում և չէին կարողանում ժամանակին արձագանքել, սակայն, երբ սկսեցին արձագանքել պատկերը փոխվեց:

Մանրամասները՝ տեսանյութում: