Ադրբեջանցիները 1,5 կմ առաջ են եկել Խոզնավարում և հետ մղվել․ ԱԳՆ-ն՝ սահմանի ճշգրտման մասին․ Լուրեր

Տեղի համայնքապետ Ներսես Շադունցը Factor TV-ի հետ զրույցում հաստատել է տեղեկությունը, որ Տեղ խոշորացված համայնքի Խոզնավար բնակավայրի ուղղությամբ։ Նա նշել է, որ ադրբեջանցիները 2 ջոկով մտել են հայկական գյուղի վարչական տարածք, ինչից հետո հայկական ուժերը նրանց դուրս են մղել այնտեղից։

—

Դատախազությունը տեղեկացրել է, որ այս դեպքով հարուցված քրեական գործի համաձայն՝ ադրբեջանցիները մոտ 1.5 կմ առաջացել են ՀՀ տարածքով, դիրքավորվել և նրանց մոտեցած ՀՀ ԶՈւ զինծառայողների հասցեին բռնություն գործադրելու սպառնալիքներ հնչեցրել, հայտնել են, որ այդ տարածքը պատկանում է Ադրբեջանին, առաջանալու դեպքում սպառնացել են կրակ արձակել: Դրանից հետո ՀՀ ԶՈւ զինծառայողներին հաջողվել է նրանց հետ ուղարկել ելման դիրքեր:

—

Պաշտպանության նախարարությունը հայտարարել է, որ մայիսի 12-ին և 13-ին Ադրբեջանի ԶՈՒ կողմից հայ-ադրբեջանական սահմանին իրականացված սադրանքներից հետո ստեղծված իրադրությունը, մայիսի 21-ի կեսօրի դրությամբ, էական փոփոխություններ չի կրել։ Հայ և ադրբեջանցի զինվորականների մասնակցությամբ տեսանյութերի պատճառաբանությամբ Սև լճի մերձակայքում, տեղի է ունեցել վիճաբանություն, որը հարթվել է վերադաս հրամանատարության ջանքերով։

—

Հայաստանի և Ադրբեջանի միջև սահմանների սահմանագծման և հետագայում սահմանազատման գործընթացների վերաբերյալ հայկական դիրքորոշումը հայտնել է ԱԳՆ մամուլի խոսնակ Աննա Նաղդալյանը։ Նա նշել է, որ այդ գործընթացները պետք է մաս կազմեն հակամարտության համապարփակ խաղաղ կարգավորման գործընթացի, որի շրջանակներում առաջնային կերպով պետք է հասցեագրվեն Արցախի Հանրապետության տարածքների դեօկուպացիայի և Արցախի վերջնական իրավական կարգավիճակի որոշման հարցերը՝ ԵԱՀԿ Մինսկի խմբի համանախագահության հովանու ներքո:

—