15.10.2026 | 00:05
NATO-ի նավատորմին ծառայություններ մատուցող ընկերությունը կասկածվում է 1 միլիոն եվրոյի խարդախության մեջ
Ֆրանսիայում Արցախի օրերի շրջանակում մշակութային միջոցառումներ են անցկացվում
10.01.2018 | 11:44
Արցախի Հանրապետության տարբեր քաղաքների հետ բարեկամության համաձայնագրեր կնքած ֆրանսիական քաղաքներում անցկացվում են մշակութային բազմապիսի միջոցառումներ: Դրանք իրականացվում են Ֆրանսիայում Արցախի օրերի շրջանակում:
Հերթը Մարսելի Լե Պեն Միրաբո քաղաքինն է, որն այս օրերին լցված է արցախյան մշակույթի շնչով: Ինչպես «Արմենպրես»-ին տեղեկացրել է Արցախի Հանրապետության պետական նախարարի խորհրդական Արտակ Բեգլարյանը, ով այս օրերին գտնվում է Մարսելում, բավական հագեցած ծրագիր է իրականացվում:
«Կայացավ ֆրանսահայ իրավաբան Ժիրայր Գերգերյանի «Լեռնային Ղարաբաղ. Անջատման և ինքնորոշման միջև» գրքի շնորհանդեսն ու քննարկումը: Մասնակցել եմ նաև ես, ներկայացրել եմ ղարաբաղա-ադրբեջանական հակամարտության պատմությունը, ներկա իրավիճակը, Արցախի պետական ինստիտուտների առանձնահատկությունները և տնտեսական հաջողությունները»,- ասել է Արտակ Բեգլարյանը:
Գրքի ներկայացմանը զուգահեռ կազմակերպվեց ֆրանսիացի լուսանկարչի աշխատանքների ցուցահանդես` արցախյան թեմատիկայով: Միջոցառմանը ներկա էր քաղաքապետը` իր աշխատակազմով, ռեգիոնալ սենատոր, Ֆրանսիայում ԱՀ ներկայացուցիչը, հյուրեր, տեղի հայ համայնքի ներկայացուցիչներ:
Լե Պեն Միրաբո քաղաքում միջոցառումների մեկնարկը տրվել է հունվարի 6-ին, երբ կազմակերպվեց ընդունելություն տեղական ինքնակառավարման մարմինների ներկայացուցիչների, Ֆրանսիայի խորհրդարանի նախկին պատգամավորների, տարբեր գործիչների մասնակցությամբ: Հայկական երգ ու պարը ներկայացրեց Փարիզից հրավիրված հայկական մշակութային խումբը: Արտակ Բեգլարյանը տեղեկացրեց, որ նախատեսում է հանդիպել տեղի հայ համայնքի և տեղական ինքնակառավարման մարմինների ներկայացուցիչներին, որոնց հետ քննարկելու է համագործակցության մի շարք ծրագրեր:
Նշենք, որ Ֆրանսիայում Արցախի օրերի միջոցառումների մեկնարկը տրվել է նոյեմբերին, երբ Արցախի նախագահի գլխավորած պատվիրակությունն այցելել էր Ֆրանսիա:
