03.11.2026 | 11:42
Պուտինը օրենք է ստորագրել, որը թույլ կտա տեղեկություններ ստանալ ԱՊՀ երկրներում՝ նաև ՀՀ-ում, ՌԴ քաղաքացի պարտապանների մասին
Կրեմլը մեկնաբանել է Թուրքիայի՝ Ադրբեջան զինվորականներ ուղարկելու ծրագրերը․ ՌԻԱ Նովոստի
Քաղաքականություն
16.11.2020 | 14:16
Ադրբեջան զինվորականներ ուղարկելու մասին Թուրքիայի նախագահ Ռեջեփ Թայիփ Էրդողանի հրամանի նախագիծը խորհրդարան ուղարկելը ներքին գործընթաց է, որը նախատեսված է այդ երկրի օրենսդրությամբ։ ՌԻԱ Նովոստիի փոխանցմամբ՝ այս մասին լրագրողներին հայտնել է ՌԴ նախագահի մամուլի խոսնակ Դմիտրի Պեսկովը։
«Բանն այն է, որ Ադրբեջանի տարածքում լինելու է մշտադիտարկման կենտրոն, այնտեղ պետք է ուղարկվեն թուրք զինվորականներ, դա ներքին գործընթացների իրականացում է, գործընթաց, որը նախատեսված է Թուրքիայի Հանրապետության ներքին օրենսդրությամբ։ Դա Թուրքիայի ներքին գործն է։ Իսկ ինչ վերաբերում է համատեղ մշտադիտարկման կենտրոնին, ապա այն հանդիսանում է Ռուսաստանի ու Թուրքիայի միջև երկկողմ պայմանավորվածությունների արդյունք»,- հայտարարել է Պեսկովը։
Հիշեցնենք՝ ավելի վաղ թուրքական «Անադոլու» գործակալությունը հայտնել էր, որ Ադրբեջան թուրք զինվորականների ուղարկելու մասին Թուրքիայի նախագահ Ռեջեփ Թայիփ Էրդողանի հրամանի նախագիծն ուղարկվել է երկրի խորհրդարան։
Տաթև Ֆռանգյան
