Գյումրիում ԱԹՍ-ների կառավարման արագացված դասընթացներ են կազմակերպվում

Հայաստանում  հայտարարված ռազմական դրությամբ պայմանավորված՝ Գյումրու ավիամոդելային խմբակն իրականացնում է անմիջական և ավտոմատ ղեկավարվող թռչող սարքերի (ԱԹՍ) կառավարման արագացված դասընթացներ:

Ավիամոդելային խմբակի տնօրեն Խաչատուր Թադևոսյանը Factor.am-ի հետ զրույցում ասաց, որ փորձում են կարճ ժամանակում ինչ-որ օգուտ տալ, դասընթացներին էլ մասնակցել ցանկացողների թիվը բավական մեծ է։

«Առաջին խնդիրն այն է՝ շատ կարճ ժամանակում հնարավո՞ր էր, արդյոք, մարդկանց պատրաստել, որոնք կարող են ռազմական իրավիճակում ինչ-որ օգուտ տալ։ Սկզբից 20 հոգու համար էինք նախատեսել, մի 100 հոգի դիմել էին պատերազմի առաջին օրից սկսած։ Հետո արդեն այլ կազմակերպություններ էլ միացան, ցանկացան օգնել։ Հիմա 1․400-1․500 մարդ կա արդեն»,- ասաց Խաչատուր Թադևոսյանը։

Դասընթացներն ամեն օր են, 2-3 հերթափոխով, մասնակիցներն էլ՝ 20-ից բարձր տարիքային խմբի:

«Դասն իրենից ներկայացնում է սկզբից տեսական մաս, դաշտային պարապմունքներ՝ ուսումնական մոդելների վրա պետք է սովորեն կառավարել, հետո նոր կախված խնդրից ամեն մարդ իր սարքով պիտի անի ռեալ պայմաններում»,- ասաց Խաչատուր Թադևոսյանը։

Նա նշեց, որ դասընթացներին մասնակցելու համար գրանցվել ու գալիս են Հայաստանի տարբեր բնակավայրերից, աշխատում են ամենակարճ ժամանակում՝ 7-10 օրվա ընթացքում նրանց պատրաստել ու որոշակի գիտելիքներ հադորդել՝ արագ  կիրառելու համար։

Նշենք, որ Գյումրու Ավիամոդելային խմբակը հիմնադրվել է 2016 թվականի Ապրիլյան պատերազմից հետո՝ մի խումբ երիտասարդների ջանքերով։ Նպատակն անմիջական և ավտոմատ ղեկավարվող թռչող սարքեր (ԱԹՍ) պատրաստող և դրանց կառավարման հմտություններին տիրապետող մասնագետներ ունենալն է։

Էմմա Չոբանյան