Եթե ներկայիս հակամարտության միակ լուծումը Լեռնային Ղարաբաղի ճանաչումն է, պետք չէ հապաղել․ Փարիզի քաղաքապետ

Եթե ներկայիս հակամարտության միակ լուծումը Լեռնային Ղարաբաղի ճանաչումն է, պետք չէ հապաղել։ Nouvelles d`Armenie-ին տված հարցազրույցում այս մասին ասել է Փարիզի քաղաքապետ Անն Իդալգոն՝ պատասխանելով ֆրանսիացի պատգամավորների՝ այդ երկրի Ազգային ժողովի կողմից Արցախի անկախության ճանաչման պահանջի մասին հարցին։

«Ես հասկանում եմ խորհրդարանականների մոտեցումը։ Եթե ներկայիս հակամարտության միակ լուծումը Լեռնային Ղարաբաղի ճանաչումն է, մենք չպետք է հապաղենք: Սակայն ԱԳ նախարարությունը կարծում է, որ միայն Մինսկի խումբը կարող է հնարավորություն ընձեռել վերադառնալ խաղաղությանն ու անվտանգությանը: Այնպես որ՝ ես չեմ ցանկանում խոչընդոտել խաղաղ լուծում գտնելու՝ Ֆրանսիայի ջանքերը։ Ես կիսում եմ Ֆրանսիայի կառավարության առաջնահերթությունները, որը Մինսկի խմբի շրջանակում ձգտում է դադարեցնել բախումները և վերադառնալ բանակցություններին: Ես կողմ եմ ինքնորոշմանը՝ որպես անհատ, Հայաստանին պետք է աջակցել այս փորձության և այս պայքարի ընթացքում»,- ասել է Աննա Իդալգոն:

Ֆրանսիացի գործիչը նաև մատնանշել է, որ Բաքուն ակնհայտորեն ագրեսոր է այս հակամարտությունում, որին աջակցում է Թուրքիան:

«Ուստի Ալիևի ռեժիմը մեծ պատասխանատվություն է կրում: Մինսկի խմբի ֆրանսիացի, ամերիկացի և ռուսաստանցի համանախագահները պետք է որոշեն Ղարաբաղի և նրա ժողովրդի ապագան: Հույս ունեմ, որ ՄԽ-ն հնարավորինս արագ կդադարեցնի հակամարտությունը և բանակցություններ կսկսի՝ տարածաշրջանում տևական և արդար խաղաղություն հաստատելու համար»,- նշել է Փարիզի քաղաքապետը։