12.10.2026 | 23:18
Գազամատակարարման դադարեցումներ՝ Հայաստանի մի շարք հասցեներում
Դեքսամետազոնը նվազեցնում է COVID-19-ի մահացության ռիսկերը․ առողջապահական փորձագետների նոր բացահայտումը
16.06.2020 | 21:29
Մեծ Բրիտանիայի առողջապահական փորձագետները COVID-19-ի դեմ պայքարում նոր դեղամիջոց են փորձարկել․ դեքսամետազոնը։
Ըստ նրանց՝ դեղամիջոցի փոքր չափաբաժնով օգտագործումը մեծ առաջընթաց է մահացու վիրուսի դեմ պայքարում։ Փորձարկման արդյունքում դեքսամետազոնը 1/3-ով կրճատել է ԹԱՕ սարքերին միացված հիվանդների մահացության ռիսկը, իսկ թթվածնից կախյալ հիվանդների համար՝ 1/5-ով։
Բրիտանացի փորձագետները նկատում են․ եթե դեղամիջոցը հիվանդներին տրվեր համավարակի սկզբնական շրջանում, ապա մինչ օրս 5․000 կյանք փրկած կլինեին։ Օքսֆորդի համալսարանի կողմից իրականացվող փորձարկման ընթացքում COVID-19-ով հոսպիտալացված 2․000 հիվանդի դեքսամետազոն են տվել։ Արդյունքում՝ ԹԱՕ սարքերին միացված հիվանդների մահացության ռիսկը 40%-ից նվազել է մինչև 28%-ի։ Իսկ թթվածնից կախյալ հիվանդների դեպքում մահացության ռիսկը 25%-ից 20%-ի է հասել։
BBC-ի փոխանցմամբ՝ Մեծ Բրիտանիայի կառավարությունը դեքսամետազոնի 200․000-ի չափով պաշար ունի և երկրի Ազգային առողջապահության ծառայությունն այն հիվանդների համար հասանելի է դարձնելու։ Բրիտանացի պրոֆեսոր Պիտեր Հորբիի խոսքով՝ դեքսամետազոնով բուժումը մինչև 10 օր է տևում և յուրաքանչյուր հիվանդի համար այն արժե 5 ֆունտ ստերլինգ (մոտ 3000 դրամ)։
Նրա խոսքով, սակայն, չի կարելի այս դեղամիջոցը տնային պայմաններում օգտագործել, քանի որ այն չի օգնում COVID-19-ով վարակված, բայց թեթև ախտանշաններ ունեցող հիվանդներին, որոնք շնչառության հետ կապված խնդիրներ չունեն։
Հավելենք, որ դեքսամետազոնը կիրառվում է 1960-ականներից՝ հատկապես ռևմատոիդ արթրիտի և ասթմայի բուժման նպատակով։ Վերակենդանացման բաժանմունքում գտնվող հիվանդներին դեղամիջոցը տրվում է ներերակային ներարկման միջոցով, իսկ քիչ ծանրւթյան հիվանդներին՝ հաբերի տեսքով։
Նելլի Մելքոնյան
