27.10.2026 | 23:30
Հայաստանի, Ադրբեջանի և Վրաստանի դեսպանները քննարկել են Հարավային Կովկասի խաղաղության և կայունության ամրապնդման հարցերը
Պաշտոնանկություններ կառավարությունում․ 2 նախարար, ուժային կառույցների ղեկավարներ ու ՊԵԿ նախագահն ազատման դիմում են ներկայացրել
Քաղաքականություն
17.11.2024 | 23:31
Factor TV-ի հաստատված տեղեկություններով՝ հրաժարականի դիմումներ են ներկայացրել ՆԳ նախարար Վահե Ղազարյանը, ՏԿԵ նախարար Գնել Սանոսյանը, ՔԿ նախագահ Արգիշտի Քյարամյանը, ՊԵԿ նախագահ Ռուստամ Բադասյանը և Հակակոռուպցիոն կոմիտեի նախագահ Սասուն Խաչատրյանը։
Փորձեցինք տեղեկության հաստատումը ստանալ նաև նրանց խոսնակներից։ Նշված բոլոր պաշտոնյաների մամլո խոսնակները, սակայն, հեռախոսազանգերի չեն պատասխանում, չեն արձագանքում նաև գրավոր հարցումներին։
Իշխող «Քաղաքացիական պայմանագիր» խմբակցության անդամները ևս չեն մեկնաբանում շրջանառվող տեղեկությունները։ Նրանցից մի քանիսը Factor.am-ին փոխանցեցին, որ մամուլի հրապարակումներից են տեղեկացել սպասվող հրաժարականների մասին։
Հիշեցնենք՝ Կառավարության վերջին նիստի ժամանակ վարչապետ Նիկոլ Փաշինյանը բավական վրդովված անդրադարձ կատարեց իրավապահ համակարգին՝ շեշտելով՝ իր համբերության բաժակը լցվել է։
«Իմ համբերության բաժակը լցվել է, ոնց որ քյասիբի ռադիո լինեմ. գալիս եմ ձեր բոլորի միջոցառումներին, ելույթ եմ ունենում, խոսում եմ, դուք էլ ծափ եք տալիս, ես թողնում, գնում եմ, հետո հաջորդ տարի էլի գալիս եմ, նույն ելույթն եմ ունենում, դուք ավելի ուժեղ եք ծափ տալիս, ես թողնում, գնում եմ։ Ուզում եմ հասկանալ` ո՞վ ա ում ձեռ առնում։ Ես ուղիղ եմ ասում` սրա վերջը եկել է»,- իր խոսքում նշել էր Փաշինյանը։
