04.04.2026 | 16:35
«Օրիոն»-ն անցել է դեպի Լուսին ճանապարհի կեսից ավելին
Հունաստանի խորհրդարանական ընտրություններում հաղթել է ընդդիմությունը
Քաղաքականություն
08.07.2019 | 14:09
Հունաստանում կայացած արտահերթ խորհրդարանական ընտրությունների արդյունքում հաղթել է «Նոր ժողովրդավարություն» ընդդիմադիր կուսակցությունը։ Այս մասին հայտնում է BBC-ի ռուսական ծառայությունը։
Հունաստանի ՆԳՆ-ի տվյալներով՝ քվեաթերթիկների 90%-ի հաշվարկի արդյունքներով՝ «Նոր ժողովրդավարություն» կուսակցությունը 39.78% է հավաքել, իսկ իշխող «Սիրիզա» կուսակցությունը՝ 31.56%։
Չնայած ստացած քվեների միջև տարբերությունը շատ մեծ չէ՝ «Նոր ժողովրդավարությունը» խորհրդարանում բացարձակ մեծամասություն կկազմի, քանի որ հաղթող կուսակցությունը խորհրդարանում հավելյալ 50 տեղ է ստանում։
Հունաստանի վարչապետ Ալեքսիս Ցիպրասն արդեն շնորհավորել է «Նոր ժողովրդավարություն» կուսակցության առաջնորդ Կիրիակոս Միցոտակիին հաղթանակի կապակցությամբ: Ցիպրասն այսօր Միցոտակիսին կընդունի իր նստավայրում և նրան կհանձնի վարչապետի առանձնասենյակը։
Նշենք, որ Ալեքսիս Ցիպրասն իշխանության էր եկել 2015 թվականին։ Արտահերթ խորհրդարանական ընտրությունների մասին նա հայտարարել էր մայիսին՝ տեղական ու եվրոպական ընտրություններում իր կուսակցության անհաջող մասնակցությունից հետո։
Նելլի Մելքոնյան
