Քաղաքականություն
04.07.2019 | 13:38
Մոսկվայի և Կիևի միջև երկխոսությունը հնարավոր է, եթե Ուկրաինայի նախագահ Վլադիմիր Զելենսկին կատարի նախընտրական խոստումները և խոսի Դոնբասի իր հայրենակիցների հետ։ Այս մասին իտալական Corriere della Sera պարբերականին տված հարցազրույցում հայտարարել է ՌԴ նախագահ Վլադիմիր Պուտինը, գրում է ՏԱՍՍ-ը:
«Կիևի հետ կառուցողական երկխոսությունը հնարավոր է, եթե Զելենսկին դադարի Դոնբասի իր հայրենակիցներին ծայրահեղականներ անվանել, և եթե ուկրաինական իշխանությունները կատարեն Մինսկի պայմանավորվածությունները, այլ ոչ թե արհամարհեն դրանք»,- նշել է ՌԴ նախագահը:
Պուտինն ընդգծել է, որ Ուկրաինայի քաղաքացիները Զելենսկուց և նրա թիմից ակնկալում են ոչ թե հայտարարություններ, այլ իրական գործողություններ ու դրական փոփոխություններ: Ըստ նրա՝ Ուկրաինայի նոր իշխանությունները ստիպված կլինեն լուծել խնդիրները, որոնք երկրի նախորդ ղեկավարությունն է թողել։
«Բռնի ուկրաինացումը, Ուկրաինայի միլիոնավոր քաղաքացիներին հարազատ ռուսերենով խոսելու, ինչպես նաև բուհերում ու դպրոցներում այն կիրառելու արգելքները, երկրի հարավ-արևելքում քաղաքացիական հակամարտությունը մի մասն են այն անցանկալի «բեռի», որով նոր նախագահը պետք է զբաղվի»,- նշել է Վլադիմիր Պուտինը։
Ըստ նրա՝ Կիևի իշխանությունները, ի վերջո, պետք է հասկանան, որ ընդհանուր շահին ծառայում է ոչ թե Ռուսաստանի և Ուկրաինայի առերեսումը, այլ պրագմատիկ համագործակցության զարգացումը՝ հիմնված վստահության և փոխըմբռնման վրա, և հավելել, որ իրենք դրան պատրաստ են:
Նելլի Մելքոնյան
