Քաղաքականություն
07.06.2019 | 20:30Factor.am-ի հարցազրույցը Պետական գույքի կառավարման կոմիտեի նախագահ Նարեկ Բաբայանի հետ
– Պարո՛ն Բաբայան, հեղափոխությունից մինչև այսօր պետական ի՞նչ գույք է մասնավորեցվել։ Կա՞ն մասնավորեցված օբյեկտներ, որոնք հանրությանը հայտնի են։
– Հեղափոխությունից հետո խոշոր գույք չի մասնավորեցվել։ Մենք որոշ ժամանակ դադարեցրել էինք գործընթացը։ Նախ ուզում էինք հասկանալ, թե ինչ սկզբունքներ և մեխանիզմներ են գործել, որոնք նպաստավոր էին կոռուպցիայի համար։ Հիմա քննարկվում է Հանրապետության հրապարակում գտնվող՝ Տրանսպորտի և կապի նախարարության նախկին շենքի և մի շարք այլ գույքի մասնավորեցման հարցը։ Արդեն գործնական հունի մեջ ենք մտել։
– ՏԿՆ շենքի դեպքում կա՞ կոնկրետ գնորդ։
– Նախկինում այդ շենքն աճուրդի է հանվել, բայց այն չի կայացել, քանի որ մասնակից չի եղել։ Մենք հիմա ուզում ենք ներդրողներ գտնել։ Աճուրդով գնելու դեպքում գնորդը որևէ պարտավորություն չի ստանձնում գույքի նկատմամբ, իսկ մենք այդ տարբերակին կողմ չենք։ Տարիներ առաջ ԱԳՆ նախկին շենքն աճուրդով է մասնավորեցվել, և այնտեղ որևէ գործողություն դեռ չի կատարվել։ Եթե վաճառված լիներ մրցույթով և պայման դրված լիներ, որ երեք տարվա ընթացքում պետք է վերագործարկվի և ինչ պետք է արվի, հիմա գնորդը դա պետք է արած լիներ կամ պետք է տուգանքներ մուծեր։
– Իսկ արդեն կասկածելի պայմաններում պետական գույքի մասնավորեցման մանրամասներին անդրադառնալու, դրանց իրավական գնահատական տալու կամ պետությանը վերադարձնելու քննարկումներ կա՞ն։
– Կան մասնավորեցված օբյեկտներ, օրինակ՝ Արամ Հարությունյանին պատկանող շենքը։
– Հանրապետության հրապարակում գտնվող շե՞նքը, որն Ա.Հարությունյանը սեփականաշնորհել էր քաղաքաշինության նախարար եղած ժամանակ, և որը հիմա բարձր վճարներով վարձակալության է հանձնում պետական գերատեսչություններին։ Այդ շենքի մասնավորեցման օրինականությունն ուսումնասիրո՞ւմ եք։
– Այո՛։ Այդ շենքի դեպքում կան բազմաթիվ խնդիրներ։ Ժամանակին տարբեր գերատեսչություններ, հանձնաժողովներ այդ շենքի մասնավորեցման մասին կարծիքներ են տվել՝ հաշվի չառնելով պետության շահը։ Իսկ մասնավորեցման մանրամասները պարզելն արդեն իրավապահների գործն է։ Բայց, պարզելուց զատ, կա նաև վաղեմության խնդիր։ Օրենսդրական փոփոխությունների կամ անցումային արդարադատության շրջանակում պետք է այդ հարցերը կարգավորվեն։ Ի վերջո՝ մարդիկ պետք է գան ու ներկայացնեն, թե որտեղից իրենց այդ գույքը։ Այդպիսի գույքերը շատ են նախկին պաշտոնյաների մոտ։
– Մաքսային կոմիտեի նախկին նախագահ Արմեն Ավետիսյանը հայտարարեց, որ իրեն պատկանող Ծաղկաձորի «Գոլդեն փելես» հյուրանոցը նվիրում է պետությանը։ Վարչապետ Նիկոլ Փաշինյանը հայտարարեց, որ այն շուրջ 20 մլն դոլար կարժենա։ Այդ հյուրանոցը հասա՞վ պետությանը։
– Տեղեկություններ կային, որ վնասով է աշխատել։ Հյուրանոցը գնահատված չէ դեռ։ Բայց գնահատումն էլ կարող է նշանակություն չունենալ, որ եթե գնորդ չունենա, աճուրդում գինը կնվազի։ Բայց գործընթացը դեռ շարունակվում է, մի քանի ամիս քննարկվում էին հնարավոր ռիսկերը, հիմա արդեն վերջնական գնահատումն է կատարվում։ Դրանից հետո արդեն կարող ենք ներկայացնել Կառավարության որոշման նախագիծ և ընդունել հյուրանոցը։
Հարցազրույցն ամբողջությամբ՝ տեսանյութում:
Արմինե Ավետյան
