Հեգսեթը չհայտարարված այց է կատարել Իսրայել և հանդիպել Նեթանյահուին

ԱՄՆ պատերազմի նախարար Փիթ Հեգսեթը երկուշաբթի Իսրայել կատարած չհայտարարված այցի ընթացքում հանդիպել է  երկրի վարչապետ Բենիամին Նեթանյահուի հետ։ Այս մասին հայտնել է իրավիճակին ծանոթ աղբյուրը՝ ԱՄՆ-ի և Իրանի միջև լարվածության սրման ֆոնին, գրում է Reuters-ը:

Աղբյուրը չի հայտնել, թե ինչ են քննարկել երկու պաշտոնյաները հանդիպման ընթացքում, որի մասին առաջինը գրել էր Axios-ը։ Պենտագոնը հրաժարվել է մեկնաբանություն տալ։ Իսրայելի վարչապետի գրասենյակը չի պատասխանել մեկնաբանության խնդրանքին։

Հեգսեթը սոցիալական ցանցերում գրառման մեջ հայտնել է, որ այցելել է ԱՄՆ զինծառայողներին Կենտրոնական հրամանատարության պատասխանատվության գոտում, որն ընդգրկում է Մերձավոր Արևելքը, Աֆրիկայի հյուսիսարևելյան հատվածը և Ասիայի որոշ շրջաններ։ Իսրայելի «Բանակային ռադիոյի» հաղորդմամբ՝ Հեգսեթի և Նեթանյահուի հանդիպումը տեղի է ունեցել Իսրայելի հարավային անապատային շրջանում գտնվող ռազմաօդային բազայում։

Հեգսեթի այցը տեղի է ունեցել Մերձավոր Արևելքում պատերազմի ֆոնին լարվածության աճի պայմաններում։ ԱՄՆ-ի և Իրանի միջև լարվածությունը սրվել է Հորմուզի նեղուցի շուրջ, իսկ Իրանի դաշնակից Եմենի հութիներն ակտիվացրել են Սաուդյան Արաբիայի վրա հարձակումները։

Այցը տեղի է ունեցել նաև ԱՄՆ նախագահ Դոնալդ Թրամփի՝ Իսրայելի առաջիկա շաբաթվա խորհրդարանական ընտրություններում Նեթանյահուին աջակցություն հայտնելուց մեկ օր անց։ Դրանք Իսրայելում առաջին ընտրություններն են լինելու 2023 թվականի հոկտեմբերի 7-ին ՀԱՄԱՍ-ի՝ երկրի հարավի վրա իրականացրած հարձակումից հետո։

ԱՄՆ-ի և Իսրայելի զինված ուժերը փետրվարի վերջին համատեղ հարվածներ են հասցրել Իրանին՝ սկիզբ դնելով Մերձավոր Արևելքում ավելի լայնածավալ պատերազմին։ Նեթանյահուն այս ամիս իսրայելական լրատվամիջոցներին հայտնել էր, որ հոկտեմբերի 27-ին կայանալիք Իսրայելի խորհրդարանական ընտրություններից առաջ մտադիր չէ հարձակվել Իրանի վրա։ Թրամփն էլ հայտարարել է, որ նոյեմբերին ԱՄՆ-ում կայանալիք միջանկյալ ընտրություններից առաջ չի հարձակվի Իրանի վրա։