20.10.2026 | 23:17
COP17-ի շրջանակում քննարկվել է ավանդական գիտելիքի դերը կենսաբազմազանության պահպանության գործում
Տեսնում եմ դավադիր պատերազմ հրահրելու, որոշ տարածքներ հանձնելու և պատասխանատվությունը ՀՀ Կառավարության վրա դնելու հեռահար նպատակ․ Փաշինյան․ ՏԵՍԱՆՅՈՒԹ
Քաղաքականություն
20.05.2019 | 13:01
«Հարգելի՛ գործընկերներ,
ուզում եմ անդրադառնալ ևս մեկ թեմայի, որը ստեղծված իրավիճակի հետ կապ ունի ուղղակիորեն։
Ակնհայտ է, որ կան նախկին կոռուպցիոն համակարգը ներկայացնող կոնկրետ ուժեր, ովքեր փորձ են անում կյանքի կոչել իրենց կողմից նախկինում կիրառված բանաձևը, այն է՝ տարաձայնություններ, հակասություններ և նույնիսկ թշնամանք հրահրել Արցախի և Հայաստանի ժողովրդի միջև՝ «բաժանիր, որ տիրես» տրամաբանությամբ՝ նախկինում իրենց կողմից թույլ տրված կոռուպցիոն հանցագործությունները կոծկելու նպատակով, չնայած բոլորիս ակնհայտ է, որ մեր երկրում համակարգային կոռուպցիայից Արցախի մեր հայրենակիցներն ավելի շատ են տուժել, բայց այդ համակարգերի որոշ պաշտոնյաներ գործադրում են կոռուպցիոն կապերը Արցախում ՀՀ-ի Կառավարության և անձամբ վարչապետի դեմ ստահոդ քարոզչություն իրականացնելու նպատակով։
Դեռևս նախորդ տարվա խորհրդարանական ընտրությունների քարոզարշավին ասել եմ, որ այս ամենը վերլուծելով դրա տակ տեսնում եմ ընդհուպ դավադիր պատերազմ հրահրելու, անգամ որոշ տարածքներ հանձնելու և տեղի ունեցածի պատասխանատվությունը ՀՀ Կառավարության վրա դնելու հեռահար նպատակ, և այս իմաստով դա համարում եմ պետական դավաճանության նման գործունեություն։
Որպես Արցախի անվտանգության երաշխավորը հանդիսացող ՀՀ վարչապետ և պատերազմական իրավիճակներում Զինված ուժերի գերագույն հրամանատար՝ ձեռնարկելու եմ ամենակոշտ միջոցները այս դավադիր մտադրությունները արմատախիլ անելու համար։
Իմիջիայլոց, կարծում եմ, հասունացել է ժամանակը 2016 թվականի ապրիլյան պատերազմի հանգամանքներն ուսումնասիրող ԱԺ քննիչ հանձնաժողով ստեղծելու և մեզ բոլորիս հուզող մի շարք հարցերի պատասխանները ստանալու համար։
Ամփոփելով Արցախ-Հայաստան թեման՝ կոչ եմ անում Արցախի մեր ժողովրդին միանշանակ և աներկբա ոչ ասել, մերժել բոլոր այն ուժերին, ում գործունեությունն ուղղված է մեր ժողովրդի երկու հատվածների միջև հակասություններ սերմանելուն։ Արցախի ժողովրդին կոչ եմ անում աջակցել միայն այն ուժերին, ովքեր հանդես են գալիս ՀՀ ժողովրդի և նրա լեգիտիմ ներկայացուցիչ Կառավարությանն աներկբա աջակցելու դիրքերից, մյուս բոլոր ուժերը միայն մեկ նպատակ ունեն՝ Արցախի ժողովրդին օգտագործել իրենց նեղ խմբային շահերը սպասարկելու, նախկինում գործած հանցագործությունների համար պատասխանատվությունից խուսափելու համար, Հայաստանի և Արցախի ինքնիշխանության դեմ դավադրություն հրահրելու համար»,- ասաց վարչապետը։
