Էս փախեփախի տրամաբանությունից դուրս եկեք. վարչապետը դիմեց ընդդիմադիրներին. ՏԵՍԱՆՅՈՒԹ

Կառավարությունն այսօրվա նիստում մերժեց ՀՀ Ազգային ժողովի ԲՀԿ-ական պատգամավոր Սերգեյ Բագրատյանի ներկայացրած՝ «Հայաստանի Հանրապետության գիտությունների ազգային ակադեմիայի մասին» Հայաստանի Հանրապետության օրենքում լրացում կատարելու մասին» Հայաստանի Հանրապետության օրենքի նախագիծը:

ԿԳ նախարար Արայիկ Հարությունյանն ընդգծեց՝ առաջարկը մերժելիս կարծրատիպերով չեն առաջնորդվել: Նա նշեց, որ պատգամավորն առաջարկում է «գիտական գործունեությունն ապահովելու նպատակով ՀՀ Կառավարության կողմից ԳԱԱ-ին օգտագործման համար ամրացված գույքը հասարակական կամ պետական կարիքների համար կարող է օտարվել միայն բացառիկ դեպքերում՝ օրենքով»:

Նախարարն առաջարկեց օրենքի գործող հոդվածն անփոփոխ թողնել՝ հիմնավորելով. «Մասնավորապես, նախագծում նշված չէ, թե որ դեպքերն են համարվում բացառիկ, և ինչով է պայմանավորված ԳԱԱ-ի առանձնահատկությունը գույքի օտարման կարգավորումների հարցում»:

Վարչապետ Նիկոլ Փաշինյանն էլ ասաց՝ այս նախագիծը կարդալիս տպավորություն է, որ Կառավարությունը որոշել է Ակադեմիայի շենքն ինչ-որ օլիգարխի վաճառել, ընդ որում՝ թաքուն:

«Եվ հիմա ընդդիմությունն արագի մեջ խնդիրներ է լուծում, որ այդ շենքը պաշտպանի օտարումից: Հարգելիներս, այդ ժամանակներն անցել են: Ես անընդհատ ուզում եմ մեր քաղաքական ուժերին կոչ անել, որ այդ փախեփախի տրամաբանությունից դուրս գան, որ բոլորը հավաքված են՝ ինչ-որ տեղից ինչ-որ բան գողանալու, տանելու, ծախելու, մսխելու տրամաբանության մեջ: Ես այս նախագիծն ընդհանրապես չեմ հասկանում»:

Մանրամասները՝ տեսանյութում:

Շողիկ Գալստյան