Մենք պիտի հասկանանք՝ հակառակորդին ինչպես հաջողվեց առաջխաղացում ունենալ. Անդրանիկ Քոչարյանը՝ ապրիլյան քառօրյայի մասին. ՏԵՍԱՆՅՈՒԹ

Այս պահին գնում է բանակցային գործընթաց, հարաբերական խաղաղ պայմաններ են, և այս խաղաղությունը պետք է օգտագործել՝ Արցախի և Հայաստանի զինական ուժն ավելացնելու և ամրապնդելու համար: Ապրիլի 2-ին Եռաբլուրում լրագրողների հետ զրույցում ասաց ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը:

«Մենք անընդհատ ձգտել ենք խաղաղության, բայց երբ ադրբեջանական հենակետերից հայտնվել ենք կրակի տակ, Արցախի պաշտպանության բանակն ուրիշ տարբերակ չի ունեցել՝ այդ կրակը լռեցնելու: Մենք պետք է միշտ ձգտենք խաղաղության, բայց հակառակորդը երբեք չպետք է ունենա այդ հնարավորությունը՝ իր հենակետերից նորից կրակի տակ վերցնելու մեր բնակավայրերը: Մեր անվտանգությունը պետք է լինի անխոցելի»,- ասաց Քոչարյանը՝ պատասխանելով ԱՄՆ-ում ՀՀ պաշտպանության նախարար Դավիթ Տոնոյանի հայտարարության մասին հարցին:

Նրա խոսքով՝ մենք ժամանակին անընդհատ ասում էինք, որ մենք ունենք տարածաշրջանի ամենամարտունակ բանակը, և դա ինչ-որ առումով թուլացրեց մեր զգոնությունը: «Ես գնահատում եմ, որ ապրիլյան պատերազմը նաև այդ զգոնության կորստի պատճառ էր, և այսօր ապրիլյան դասն է, որ բանակը միշտ պետք է լինի զգոն վիճակում, պետք է լինի զարգացման, ուժեղացման փուլում: Ուժեղ բանակի առկայությունն է, որ հետագայում կզսպի հակառակորդին ապրիլյան ավանտյուրայի կիրառումից»,- հավելեց Անդրանիկ Քոչարյանը:

Հարցին՝ արդյո՞ք պետք է ապրիլյան պատերազմի վերաբերյալ քննություն, մեղավորներին պատժելու գործընթաց սկսել, Քոչարյանը պատասխանեց. «Ես հիմք եմ ընդունում վարչապետ Նիկոլ Փաշինյանի ասածը: Վարչապետը կարդացել է բազմաթիվ փաստաթղթեր ապրիլյան պատերազմի մասին, հատկապես՝ հետախուզության կողմից տրամադրված: Այստեղ, իհարկե, անելիք կա, որպեսզի ամբողջապես հասկանանք, թե ապրիլին տեղի ունեցածին մենք ինչքանով էինք պատրաստ, և եթե պատրաստ չէինք, եթե կան մեղավորներ, նրանք պետք է պատասխանատվության ենթարկվեն: Բայց նախ մեզ համար պետք է հասկանանք, թե որտեղ ենք թերացել, հակառակորդն ինչպես նման հնարավորություն ունեցավ»:

Մանրամասները՝ տեսանյութում:

Լիլիթ Շաբոյան