Ապրիլյան պատերազմի մասին հայկական կողմը իմացել է և պատրաստվել է պարտության. Վարուժան Ավետիսյան. ՏԵՍԱՆՅՈՒԹ

Վաղը՝ ապրիլի 2-ին կլրանա ապրիլյան պատերազմի 3-րդ տարին: Քառօրյա պատերազմում հայկական կողմը կորցրեց մոտ 100 զինծառայող և 4 քաղաքացիական անձ, թեև Ադրբեջանի կորուստներն ավելի շատ էին, իսկ 800 հեկտար հողի կորուստի մասին առաջինը հայտնեցին «Սասնա Ծռերի» ներկայացուցիչները: «Սասնա Ծռեր» կուսակցության քարտուղարության համակարգող Վարուժան Ավետիսյանը Factor.am-ի հետ զրույցում ասաց, որ Սերժ Սարգսյանը պլանավորել էր ապրիլյան պատերազմի միջոցով հանձնել Արցախին հարակից շրջանները:

«Հենց այդպես էլ նախատեսված էր, որ պատերազմի միջոցով հողերը հանձնվեին, ուղղակի մեր սպաների ու զինվորների անձնուրաց դիմադրության պատճառով ձախողվեց և վիժեցվեց, այսպես կոչված, Լավրովյան պլանը: Իսկ նախատեսված էր ընդհանրապես քայքայել մեր պաշտպանական բնագիծը և խորանալ տարածքի մեջ, զավթել բնակավայրեր, գերի վերցնել քաղաքացիական բնակչություն, սպանել մեծ թվով զինվորների, սպաների»,- հայտարարեց Ավետիսյանը՝ հավելելով, որ այդ պարագայում կառաջանար ռուսական խաղաղապահ միջամտության անհրաժեշտություն, ռուսները զորք կբերեին, մեզ «կհաշտեցնեին» և լծակ ձեռք բերելով Ադրբեջանի վրա՝ Ադրբեջանին կբերեին իրենց ազդեցության տակ՝ դարձնելով ԵՏՄ-ի ու ՀԱՊԿ-ի անդամ. «Եվ Արցախն ամբողջությամբ պետք է հանձնվեր Ադրբեջանին»:

Հարցին, թե Սերժ Սարգսյանը, լինելով ՀՀ գերագույն գլխավոր հրամանատար, չէ՞ր կարողացել հաշվարկել հայկական զինուժի կարողությունը, Ավետիսյանը պատասխանեց, թե Սերժ Սարգսյանն ու նրա իշխանությունը «կտրված էին մեր իրականությունից»:

Իսկ Լավրովյան պլանով, ըստ Վարուժան Ավետիսյանի, Ռուսաստանը փորձել է դուրս մղել Արևմուտքին և ձեռք բերել միանձնյա վերահսկողություն ԼՂ հակամարտության նկատմամբ:

Նրա պնդմամբ՝ ապրիլյան պատերազմի մասին հայկական կողմն իմացել է և պատրաստվել է պարտության. «Սա դավաճանության ևս մի ապացույց է»: Ըստ Վարուժան Ավետիսյանի՝ կատարվածի համար պատասխանատու են Սերժ Սարգսյանը, Բակո Սահակյանը, հատուկ ծառայությունների ու բանակի՝ այդ ժամանակվա բարձրագույն հրամանատարական կազմը:

Նրա կարծիքով՝ Մադրիդյան սկզբունքները ձեռնտու են Ադրբեջանին: Վիեննայում կայացավ Փաշինյան-Ալիև պաշտոնական հանդիպումը, սակայն դեռ չի հաջողվել բանակցություններում ներգրավել Արցախը։ Ըստ Ավետիսյանի՝ Արցախի սուբյեկտացմանն ուղղված ցանկացած գործողություն «սնուցում է ռուս-թուրքական ճարտարապետությամբ ձևավորված և ռուսական գաղութատիրության հակահայ համակարգի ծրագիրը»:

«Չկա անկախ Արցախ: Արցախի սուբյեկտացմամբ Արցախի օտարում է տեղի ունենում: Մենք հայտնվում ենք Ռուսաստանի ձեռքի տակ: Մենք մեր ձեռքով Արցախը որպես մանրադրամ դնում ենք նրա ափի մեջ՝ ասելով՝ ինչպես ուզում ես, տնօրինիր»,- հայտարարեց «Սասնա Ծռերի» անդամը:

Նրա խոսքով՝ Արցախի օտարման «հակահայ ակունքից» է սնվում պաշտոնական Երևանի տեսակետը, թե հարկավոր է Արցախի մասնակցությունն ապահովել բանակցություններում: «Ոչ մի մասնակցություն էլ չի լինելու: Ընդամենը մենք սնուցելու ենք Արցախի սուբյեկտացումը, Արցախի տարանջատումը Հայաստանից: Արցախի հարցը պետք է ավարտին հասցվի Հայաստանի ամբողջականության վերականգնման համատեքստում»,- հայտարարեց նա:

Հարցազրույցն ամբողջությամբ՝ տեսանյութում:

Մարինե Խառատյան