Կրեմլը մանրամասներ է հայտնել Ֆինլանդիայի ու Նորվեգիայի ղեկավարների՝ Պուտինի հետ հեռախոսազրույցից

Ռուսաստանի նախագահ Վլադիմիր Պուտինը, Ֆինլանդիայի նախագահ Ալեքսանդր Ստուբը և Նորվեգիայի վարչապետ Յոնաս Գար Ստյորեն հեռախոսազրույցի ընթացքում «մտքեր են փոխանակել ուկրաինական ճգնաժամի կարգավորման հարցերի շուրջ», ասվում է Կրեմլի հաղորդագրության մեջ, փոխանցում է BBC-ի ռուսական ծառայությունը։

Նշվում է, որ կողմերը ողջունել են ԱՄՆ-ի մասնակցությամբ եռակողմ բանակցությունների վերսկսումը, որոնք նախատեսվում է անցկացնել նոյեմբերի առաջին կեսին։

Միևնույն ժամանակ, Պուտինը «գնահատել է» ռազմաճակատում տիրող իրավիճակը և «հիշեցրել» հակամարտության «սկզբնապատճառների» մասին։ Նա ընդգծել է, որ երկարաժամկետ և արդար խաղաղության կարելի է հասնել միայն Ռուսաստանի «օրինական շահերի լիարժեք և անվերապահ հաշվի առնելու» դեպքում։ Պուտինը նաև ուշադրություն է հրավիրել «ԵՄ-ի և ՆԱՏՕ-ի երկրների առճակատման քաղաքականության վրա, որը հանգեցնում է ռազմական գործողությունների ձգձգմանը»։

Ուկրաինայից բացի՝ կողմերը քննարկել են նաև Բալթիկ ծովի տարածաշրջանի և Հյուսիսային Եվրոպայի անվտանգության ու կայունության հարցերը։

Կրեմլի հայտարարության համաձայն՝ երեք երկրների առաջնորդները պայմանավորվել են պահպանել ուղիղ հեռախոսային կապը։

Ֆինլանդիայի նախագահականն ավելի վաղ հայտնել էր, որ հեռախոսազրույցի ընթացքում Ստուբն ու Ստյորեն ընդգծել են, որ իրենց երկրներին միավորում է Բալթիկ ծովի տարածաշրջանում և Հյուսիսային Եվրոպայում կայունության ու կանխատեսելիության պահպանման շահագրգռվածությունը։

Եվրոպական կողմի նախաձեռնությամբ Պուտինի հետ հեռախոսազրույցից հետո Ստուբն ու Ստյորեն հեռախոսազրույց են ունեցել Ուկրաինայի նախագահ Վլադիմիր Զելենսկու հետ։

«Մենք քննարկել ենք Պուտինի հետ մեր զրույցը։ Ֆինլանդիան և Նորվեգիան կշարունակեն աջակցել ինչպես Ուկրաինային, այնպես էլ արդար և երկարաժամկետ խաղաղության հասնելու ջանքերին»,- գրել է Ստուբը X սոցիալական ցանցում։