Նորվեգիայում ընթանում է Զելենսկիի հանդիպումը Թրամփի հատուկ բանագնացների հետ

Ուկրաինայի նախագահ Վլադիմիր Զելենսկին Նորվեգիայի մայրաքաղաք Օսլոյում սկսել է հանդիպումը ԱՄՆ նախագահի հատուկ բանագնաց Սթիվ Ուիթկոֆի հետ։ Հանդիպմանը մասնակցում են նաև Նորվեգիայի վարչապետը և Ֆինլանդիայի նախագահը, գրում է Current time-ը։

Օսլո կատարած այցի ընթացքում Վլադիմիր Զելենսկին հանդիպել է Նորվեգիայի թագավոր Հակոն VIII-ի հետ և նրա հետ քննարկել ուկրաինացի երեխաների վերադարձի ուղիները, ինչպես նաև օկուպացված Օլեշկիում բնակվող ուկրաինացիներին օգնություն ցուցաբերելու հարցը։

Ավելի վաղ լրատվամիջոցները հայտնել էին, որ ԱՄՆ նախագահի հատուկ բանագնաց Սթիվ Ուիթկոֆը կմասնակցի Օսլոյում Ուկրաինայի նախագահ Վլադիմիր Զելենսկու և եվրոպական առաջնորդների հետ բանակցություններին։ Դրանից հետո նա նախատեսում է մեկնել Ռուսաստան՝ Վլադիմիր Պուտինի հետ հանդիպելու համար։

Նորվեգիայի կառավարությունը հաստատել է, որ Օսլոյում կայանալիք հանդիպմանը կմասնակցեն Զելենսկին, Ուիթկոֆը, Նորվեգիայի վարչապետ Յոնաս Գար Ստյորեն և Ֆինլանդիայի նախագահ Ալեքսանդր Ստուբը։ Թրամփի փեսան և խորհրդական Ջարեդ Քուշները բանակցություններին կմիանա հեռավար ձևաչափով։

Reuters-ի տվյալներով՝ դիվանագիտական խորհրդակցություններին ներգրավված են նաև Մեծ Բրիտանիայի, Ֆրանսիայի, Գերմանիայի, Լեհաստանի, Եվրամիության և ՆԱՏՕ-ի ներկայացուցիչները։

«Ուկրաինան խնդրել է ԱՄՆ հատուկ բանագնացներ Սթիվ Ուիթկոֆին և Ջարեդ Քուշներին միանալ հանդիպումներին։ Ես ուրախ եմ, որ նրանք կկարողանան մասնակցել»,- հայտարարել է Ստյորեն։

Axios-ը գրել էր, որ Մոսկվա հնարավոր այցի ընթացքում Ուիթկոֆը մտադիր է Պուտինին ներկայացնել պատերազմի դադարեցման վերաբերյալ առաջարկներ, որոնք մշակվել են Ուկրաինայի և եվրոպացի գործընկերների հետ համատեղ։

Ռուսաստան այցի ամսաթիվը դեռ հայտնի չէ։ Աղբյուրների տվյալներով՝ բանակցությունների ընթացքում կարող է քննարկվել նաև 73-ամյա ամերիկացի Սթիվեն Հաբարդի ազատ արձակման հարցը։ 2024 թվականի հոկտեմբերին Ռուսաստանի դատարանը նրան վարձկանության մեղադրանքով դատապարտել է վեց տարի և տասը ամիս ազատազրկման։

Թարգմանությունը՝ Էմմա Չոբանյանի