Կուսակցություններն են ներկայացնում հանձնաժողովի անդամներին. Մուկուչյանը՝ հանձնաժողովներում ընդգրկված անտեղյակ անդամների մասին

Երեկ՝ դեկտեմբերի 9-ին Factor.am-ը լուսաբանելով ընտրական գործընթացը, արձանագրել էր մի շարք խախտումներ: Մասնավորապես, Էրեբունի վարչական շրջանում գտնվող 178 դպրոցում տեղակայված 10/49 և 10/50 ընտրատեղամասերում հանձնաժողովականները չէին տիրապետում օրենքներին, տեխնիկական մի շարք հարցերի: Սա հանդիսանում էր պատճառ, որ ընտրական գործընթացը վերածվի խառնաշփոթի: Գրել էինք, որ այս երկու ընտրատեղամասերի հանձնաժողովականները միմյանց հետո բղավոցներով հարցեր էին ճշտում, քվեատուփը շուռ էին տվել սեղանին, ինչպես նաև քվեատուփից քվեաթերթիկները հանում էին մի շարք անձինք, սակայն դա վերապահված է միայն հանձնաժողովի նախագահին:

ԿԸՀ նախագահ Տիգրան Մուկուչյանը, Factor.am-ի հետ զրույցում անդրադառնալով այս խախտումներին, նշեց, որ ընտրատեղամասային հանձնաժողովի կազմը ձևավորվում է Ազգային ժողովի ուժերի կողմից ներկայացված թեկնածուներից և երկուական ներկայացուցիչներ էլ ներկայացնում են տարածքային հանձնաժողովները:

Ըստ էության, Մուկուչյանի ասածի ենթատեքստում այն է, որ մեղավորները կուսակցություններն են, որոնք հանձնաժողովներում ընդգրկել են նման չպատրաստված անդամների: Այնուհետ ԿԸՀ նախագահն ասաց, որ հանձնաժողովի անդամները վերապատրաստման համար քիչ ժամանակ են ունեցել:

«Հանձնաժողովների կազմավորումից հետո մենք ունեինք ընդամենը 12 օր և այդ օրերի ընթացքում կազմակերպվեցին դասընթացներ: Նրանց առանձին ուղեցույցեր են բաժանվել և մեծ ծավալի ուսումնական բնույթի նյութեր է հանձնվել, թե քայլերի հաջորդականությունը որոնք են»,- ասաց նա:

Տիգրան Մուկուչյանը խոստովանեց, որ չէին կարող կուսակցությունների կողմից առաջադրած հանձնաժողովի անդամների թեկնածուներին պարտադրել, որ մասնակցեն դասընթացներին: «ԿԸՀ-ն աշխատում է նրանց նշանակած կուսակցությունների հետ, որ մասնակցեն այդ դասընթացներին: Այս անգամ մոտ 80 տոկոս մասնակցություն է արձանագրվել: Ձեր նշած դեպքերի հետ կապված ասեմ, որ նրանց մոտ բոլոր ուսումնական նյութերն առկա են եղել: Եթե մեկ անգամ լիարժեք ուղեցույցն ընթերցեին, ապա այն կդառնար նրանց համար մատչելի: Ես կարծում եմ, որ հանձնաժողովի անդամներ նշանակելիս պետք է մեծ պատասխանատվությամբ մոտենան հարցին»,- եզրափակեց ԿԸՀ նախագահը:

Հայկ Վարդանյան