Հեղափոխության համար չեմ զղջում. Արմեն Գրիգորյան. ՏԵՍԱՆՅՈւԹ

Հայաստանի անվտանգության խորհրդի նախկին քարտուղար Արմեն Գրիգորյանը «Քայլ արա, մերժի՛ր Սերժին» գրքի շնորհանդեսից հետո անդրադարձել է գրքի ստեղծման պատմությանը, պաշտոնից իր հեռանալուն, հանրային քննադատություններին և հեղափոխության նշանակությանը։

Հեղինակը հայտնում է, որ 2018 թվականի թավշյա հեղափոխության մասին գիրք գրելու գաղափարն առաջացել է դեռևս շարժման հաղթանակից անմիջապես հետո՝ 2018 թվականի հունիս-հուլիս ամիսներին: Ակտիվ աշխատանքները սկսվել են 2019 թվականին, և նախատեսվում էր աշխատությունը հրատարակել 2020-ին: Սակայն համավարակն (COVID-19) ու պատերազմը երկար ժամանակով կանգնեցրին այդ գործընթացը:

Միայն նախորդ տարվա օգոստոսի 8-ին՝ խաղաղության հաստատումից հետո, որոշում է կայացվել վերադառնալ կիսատ թողած գործին, ավարտին հասցնել այն և ներկայացնել ընթերցողին: Գրքի ակտիվ ժամանակագրությունը ներկայացնում է 2018 թվականի փետրվար, մարտ, ապրիլ և մայիս ամիսների իրադարձությունները՝ ավարտվելով մայիսի 17-ով, երբ Արմեն Գրիգորյանն առաջին անգամ մտավ ԱԽ քարտուղարի իր աշխատասենյակ:

Հանրության շրջանում քննարկումների առիթ էր դարձել այն հանգամանքը, որ գրքի հրատարակումն ու շնորհանդեսը համընկան Անվտանգության խորհրդի քարտուղարի պաշտոնից նրա հեռանալու հետ: Սակայն Արմեն Գրիգորյանը կտրականապես հերքում է որևէ կապ այս երկու իրադարձությունների միջև․ «Իմ պաշտոնից հեռանալը և գրքի հրատարակումը որևէ կապ իրար հետ չունեն: Գիրքը ավելի շուտ պլանավորված էր, արդեն փետրվարին մենք ուղարկել ենք հրատարակչություն… Այս երկու գործընթացները ընդհանրապես իրար հետ որևէ կապ չեն ունեցել»:

Խոսելով սոցիալական ցանցերում հնչող քննադատությունների մասին, որոնք կապված էին պաշտոնից զրկվելուց հետո գրքի լույսընծայման հետ, հեղինակը նշեց, որ կարծիքները միանշանակ չեն: Ինչ վերաբերում է իր ներկայիս զբաղվածությանն ու ապագա քաղաքական ծրագրերին, Գրիգորյանը փակագծեր չբացեց՝ նշելով, որ այժմ զբաղված է գրքի հրատարակմամբ և ցանկանում է մի փոքր հանգստանալ։

Հարցին՝ արդյո՞ք նա զղջում է 2018 թվականին տեղի ունեցած հեղափոխության համար, ԱԽ նախկին քարտուղարը պատասխանեց. «Միանշանակ չեմ զղջում։ Այն, ինչ Հայաստանի հետ տեղի է ունեցել 2020-ին և դրան հաջորդած փուլերում… այդ ցունամին Հայաստանին մոտենում էր դեռ 2018-ից առաջ: Կարող ենք ասել 90-ականներից, 2000-ականներից կամ 2010-ականներից: 2018-ը, ես համոզված եմ, որ հայ ժողովրդի համար իմունային համակարգ է ստեղծել և հնարավորություն է տվել դիմակայելու այն բոլոր դժվարություններին, որոնց միջով անցել է»:

Գրիգորյանի պնդմամբ՝ տեղի ունեցած իրադարձություններին վերջնական գնահատականը տալիս է հանրությունը, և այդ դիրքորոշումն արտահայտվել է վերջին առնվազն երեք ընտրությունների արդյունքներով:

Մանրամասները՝ տեսանյութում։

Եվգենյա Համբարձումյան