Իսլանդիայի բնակիչները դեմ են քվեարկել Եվրամիության հետ մերձեցմանը

Իսլանդիայում Եվրամիությանն անդամակցելու հակառակորդները հաղթանակ են տարել հանրաքվեում։ Եվրամիությանն անդամակցելու շուրջ բանակցություններ սկսելու հարցով քվեարկության նախնական արդյունքների համաձայն՝ կառավարական առաջարկին՝ վերսկսել բանակցությունները, կողմ է քվեարկել ընտրողների 47,2%-ը, իսկ 52,8%-ը դեմ է արտահայտվել։ Արդյունքները կիրակի՝ օգոստոսի 30-ին, հրապարակել է տեղական RUV մեդիաընկերությունը՝ ձայների հաշվարկի ավարտից հետո։

Քվեաթերթիկների 0,7%-ը ճանաչվել է անվավեր։ Քվեարկությանը մասնակցել է ավելի քան 270 հազար մարդ՝ կղզու մոտ 400 հազար բնակչից։

Իսլանդիան ԵՄ-ին անդամակցելու հայտ էր ներկայացրել 2009 թվականի ֆինանսական ճգնաժամից հետո։ Բանակցությունները դադարեցվել էին 2013 թվականին, երբ Ռեյկյավիկում իշխանության էր եկել եվրասկեպտիկների կառավարությունը։

ԱՄՆ նախագահ Դոնալդ Թրամփի՝ Գրենլանդիան անեքսիայի ենթարկելու սպառնալիքները, Ուկրաինայում պատերազմը, ինչպես նաև աճող գնաճն ու բարձր տոկոսադրույքները ստիպել են բազմաթիվ իսլանդացիների վերանայել իրենց դիրքորոշումը։

Այնուամենայնիվ, ԵՄ-ին անդամակցելու նկատմամբ բացասական վերաբերմունքը շարունակում է գերակշռել, մասնավորապես՝ երկրի համար հսկայական նշանակություն ունեցող ձկնորսության ոլորտում։

Անդամակցության կողմնակիցների հաղթանակի դեպքում նախատեսվում էր Բրյուսելի հետ անդամակցության համաձայնագրի կնքում։ Դրանից հետո պետք է անցկացվեր նոր հանրաքվե՝ Եվրամիությանն Իսլանդիայի փաստացի անդամակցության հարցով։

Թեև Իսլանդիան ԵՄ անդամ չէ, այն ընդգրկված է Շենգենյան գոտում, ինչպես նաև Եվրոպական տնտեսական գոտում՝ 1994 թվականի հունվարի 1-ին ստեղծված միասնական շուկայական տարածքում, որը նախատեսում է մարդկանց, ապրանքների, ծառայությունների և կապիտալի ազատ տեղաշարժ։