27.08.2026 | 22:15
ՀՀ պաշտոնյաները կգործուղվեն ԱՄՆ՝ TRIPP նախագծի շուրջ բանակցությունների համար
ԵՄ-ում առաջարկում են նոր տարբերակներ գտնել՝ Ռուսաստանի 200 մլրդ եվրոյի սառեցված ակտիվներն Ուկրաինային տրամադրելու համար
Քաղաքականություն
27.08.2026 | 19:13
ԵՄ անդամ մի քանի երկրներ նամակ են ուղարկել Եվրահանձնաժողովին, որով կոչ են անում վերսկսել աշխատանքները Ուկրաինայի օգտին ռուսական սառեցված 200 միլիարդ եվրոյի ակտիվներն օգտագործելու տարբերակների վերաբերյալ, գրում է Financial Times-ը։ Պահանջը ներկայացրել են Շվեդիան, Նիդերլանդները, Իսպանիան և Լեհաստանը, գրում է The Insider-ը:
Bloomberg-ը հաղորդում է, որ ԵՄ արտաքին քաղաքականության ղեկավար Կայա Կալլասին ուղղված նամակը ստորագրվել է արտաքին գործերի նախարարների կողմից։ Ռուսական ակտիվների ճակատագրի շուրջ ակտիվ քննարկումները դադարեցվել են անցյալ ձմռանը, երբ Բելգիան, որտեղ պահվում է սառեցված միջոցների մեծ մասը, արգելափակել էր նմանատիպ նախաձեռնությունները՝ Ռուսաստանի կողմից իրավական գործողությունների մտավախությունից ելնելով։
Bloomberg-ի տվյալներով՝ Եվրոպայում սառեցված ռուսական ակտիվների օգտագործումը կլինի ԵՄ արտաքին գործերի նախարարների՝ սեպտեմբերի 1-2-ը Իռլանդիայում կայանալիք հանդիպման հիմնական թեման։ Իսպանիան, Լեհաստանը, Նիդերլանդները և Շվեդիան նախաձեռնել են վերսկսված քննարկումը։
«Ուկրաինային անհրաժեշտ է ավելի մեծ ֆինանսական աջակցություն՝ թե՛ կարճաժամկետ, թե՛ երկարաժամկետ հեռանկարում։ Սառեցված ակտիվներն օգտագործելով՝ ԵՄ-ն կարող է ապահովել, որ Ռուսաստանն անհապաղ վճարի Ուկրաինայում իր կողմից պատճառված ավերածությունների համար՝ միաժամանակ նվազեցնելով մեր սեփական հարկատուների բեռը»,- ասվում է Կալլասին ուղղված նամակում։
Դիվանագետները պահանջել են, որպեսզի Եվրահանձնաժողովի փորձագետներն ուսումնասիրեն սառեցված միջոցների՝ Ուկրաինայի շահերից ելնելով օգտագործելու նոր տարբերակները և ուղիներ գտնեն նման քայլի հետ կապված ռիսկերը ԵՄ անդամ բոլոր երկրների միջև բաշխելու համար։ Սառեցված միջոցներից ստացվող եկամուտներն արդեն օգտագործվում են Եվրամիության կողմից Ուկրաինային աջակցելու ծրագրերում․ դրանց հաշվին ֆինանսավորվում է Կիևին տրամադրվող 50 մլրդ եվրոյի վարկը։
Սակայն այդ նպատակով հենց ակտիվների օգտագործման գաղափարն արգելափակվել է Բելգիայի կողմից։ Խոսքը վերաբերում է միջոցների մեծ մասին, որոնք պահվում են Բրյուսելում գտնվող արժեթղթերի դեպոզիտարիայում՝ Euroclear-ում։ Բելգիայի իշխանությունները մտավախություն ունեն, որ եթե ռուսական ակտիվներն օգտագործվեն Ուկրաինային աջակցելու համար, Ռուսաստանը կարող է հայց ներկայացնել դատարան, և այդ դեպքում պատասխանատվությունը կարող է ընկնել հենց Բելգիայի վրա։
Բելգիայի արտաքին գործերի նախարար Մաքսիմ Պրևոն օգոստոսի կեսերին այցելել էր Կիև։ Այցի ընթացքում նա հայտարարել էր, որ երկիրը, ընդհանուր առմամբ, բաց է ռուսական սառեցված ակտիվների օգտագործման հարցում, սակայն ԵՄ մյուս երկրները պետք է իր հետ կիսեն դրա հետ կապված բոլոր ռիսկերը։
ԵՄ-ում ներքին քննարկումների ընթացքին ծանոթ The Financial Times-ի աղբյուրը հայտնել է, որ 2025 թվականի դեկտեմբերից ի վեր ոչ ոք ռուսական ակտիվների օգտագործման նոր տարբերակ այդպես էլ չի առաջարկել։
«Մենք չունենք կախարդական սպիտակ նապաստակ, որին կարելի է գլխարկից հանել։ Բայց մենք կարող ենք կատարելագործել և ճշգրտել նույն իրավական առաջարկները։ Եվ եթե քաղաքական իրավիճակը փոխվի, գուցե ինչ-որ բան ստացվի»,- նշել է նա։
Թարգմանությունը՝ Էմմա Չոբանյանի
